ОЧ

Образование Чурапчинского улуса

Госорганы и учреждения · 5 ноября 2026 г.

Открыть канал в MAX

Тыа хаһаайыстыбатын эйгэтинэн дьарыктаныы — оҕолорбут инники кэскиллэрэ

Тыа хаһаайыстыбатын эйгэтинэн дьарыктаныы — оҕолорбут инники кэскиллэрэ П.М. Васильев аатынан Соловьёв агрохайысхалаах оскуолата 100 сылыгар аналлаах «Эдэр сүөһү иитээччи маастара — 2026» республикатааҕы кэтэхтэн видео-куонкуруһу тэрийэн ыытта. Тэрээһин бу оскуола, Чурапчы улууһун үөрэҕириитин салалтата, «Эргис» СХПК уонна Чурапчы улууһун тыа хаһаайыстыбатын салалтатын көҕүлээһининэн, ону тэҥэ Арктикатааҕы судаарыстыбаннай агротехнологическай университет уонна М.Г. Сафронов аатынан Тыа хаһаайыстыбатын научнай-чинчийэр институтун өйөбүллэринэн барда. Куонкурус сүрүн сыала: - Сүөһү иитиитигэр бастыҥ ньымалары уонна албастары буларга, тарҕатарга. -Үөрэнээччилэр идэлээх маастарыстыбаларын үрдэтэргэ. - Хаһаайыстыбалар уонна фермалар тэриллиилэрин туһанарга. - Ынаҕы көрүү-харайыы, зоотехническай уонна ветеринарнай ирдэбиллэри билиини хаҥатарга. -Оҕолор тыа хаһаайыстыбатын эйгэтигэр интэриэстэрин, эппиэтинэстэрин улаатыннарарга. Куонкурус икки түһүмэҕинэн барда: 1. Практическай чаас: Хаһаайыстыба туһунан кэпсээһин, ынах сүөһү характеристиката, сааһа, усулуобуйата, ыстатыйата, тыыннаах ыйааһынын ааҕыы, ыанар массыынанан ыаһын, үүт хаачыстыбатын быһаарыы. Үлэлэр видеоматериал быһыытынан көрдөрүлүннүлэр. 2. Теоретическай чаас: Онлайн ситиминэн экспертэр ыйытыыларыгар эппиэттээһин. Дьүүллүүр сүбэҕэ Арктикатааҕы судаарыстыбаннай агротехнологическай университеттан тыа хаһаайыстыбатын наукатын кандидата А.В. Попова, П.М. Васильев аатынан Соловьёв оскуолатын методиһа Т.Т. Брызгаева уонна биология, химия учуутала М.Н. Местникова үлэлээтилэр. Куонкуруска өрөспүүбүлүкэтээҕи агротехнологическай хайысхалаах оскуолалартан — Томпо Мэҥэ-Алданыттан, Чурапчы Хайахсытыттан, Мырылаттан, Кэбээйиттэн, Ньурба Антоновкатыттан, Маалыкайтан, Сунтаартан, Мэҥэ Хаҥалас Хаптаҕайыттан уонна Хорообуттан 6–11 кылаас үөрэнээччилэрэ көхтөөхтүк кытыннылар. Кыайыылаахтар: Уопсай түмүккэ Ньурба улууһун Маалыкай орто оскуолатын 10 кылааһын үөрэнээччитэ Сергей Такыров «Гран-При» хаһаайына буолан, куонкурус кубогын тутта. Куонкурус үөрэнээччилэргэ тыа хаһаайыстыбатын уонна сүөһүнү көрүү туһунан билиилэрин дириҥэтэргэ эрэ буолбакка, эппиэтинэс, кэтээн көрүү уонна тыыннаах айылҕаны кытта үлэлиир дьоҕур курдук дьоһун хаачыстыбалары сайыннарарга көмөлөстө. Маннык тэрээһиннэр оҕолору айылҕаҕа, төрүт дьарыкка харыстабыллаах сыһыаҥҥа көҕүлүүллэр, аграрнай секторы сайыннарарга олус наадалаахтар. Мира Местникова, П.М. Васильев аатынан Соловьёв ОО биологияҕа учуутала