Убаастабыллаах улууспут үөрэҕин салаатын үлэһиттэрэ, учууталлара, төрөппүттэрэ уонна кү... — 1 сентября 2026 г. в 04:28:36.406
Убаастабыллаах улууспут үөрэҕин салаатын үлэһиттэрэ, учууталлара, төрөппүттэрэ уонна күндү үөрэнээччилэрбит! Эһигини саҥа үөрэх дьыла саҕаламмытынан — Билии күнүнэн улуус дьаһалтатын уонна тус бэйэм ааппыттан ис сүрэхпиттэн итиитик-истиҥник эҕэрдэлиибин! Уопсайа 33 оскуола, бу иһигэр: 3 оскуола-сад, 1 анал коррекционнай интернат-оскуола, 6 сүрүн оскуола, 23 орто оскуола (ол иһигэр 1 гимназия, 1 лицей-интернат, 6 агрошкола) 3273 үөрэнээччини хабан үлэлээтилэр. Бу иһигэр 21 малокомплектнай оскуолаҕа 936 оҕо үөрэннэ. Ааспыт сыл түмүктэрэ инникигэ эрэли саҕар. Улууспут оскуолаларын быйыл 225 выпускник ситиһиилээхтик бүтэрэн, 222 оҕо ситии-хотуу аттестатын тутта. Кинилэртэн 82 оҕо араас үрдүк уонна орто анал үөрэх кыһаларыгар киирэн, устудьуон үрдүк аатын сүктүлэр. Быйыл 31 оскуолаҕа 209 маҥнайгы кылаас үөрэнээччитэ киириэ диэн сабаҕалыыбыт. Тыа сирин сайдыыта, норуот кэскилэ ыччаттан тутулуктаах. Ол курдук тыа сиригэр эдэр ыаллар, эдэр учууталлар олохсуйалларыгар анаан, аныгы ирдэбилгэ толору эппиэттиир усулуобуйаны тэрийиигэ үлэ тиһигин быспакка ыытыллар. Оҕону кыра сааһыттан сайыннарыыга болҕомтобутун уурабыт. Улууспутугар оскуола иннинээҕи саастаах оҕолору хабарга 36 үөрэх тэрилтэтэ (28 уһуйаан уонна 8 оскуола иһинэн бөлөх) айымньылаахтык үлэлиир, барыта 1180 оҕону хабан, кинилэр сайдалларыгар олук ууруллар. Саҥа үөрэх дьылыгар хас биирдии оскуолаҕа, хас биирдии кылааска ураты суолтаны биэрэр хайысхабытын - Ийэ тылы сайыннарыы буолуоҕа. Төрөөбүт тылбыт — омук быһыытынан симэлийбэт силиспит, куппут-сүрбүт, өркөн өйбүт. Тылбыт баайынан киэн туттуохтаахпыт, ону оҕолорбутугар тиэрдэргэ дьулуһуохтаахпыт. Бу сыалы ситиһэргэ үөрэх эйгэтин сахалыы тыынныырга, кылаас таһынааҕы дьарыктары, күрэстэри, олимпиадалары төрөөбүт тылынан ыытарга, нэһилиэкпит кырдьаҕастарын, ытык дьонун ыҥыран, кинилэр ыллыктаах тылларын-өстөрүн истэргэ былааннаах үлэни тэрийиигэ сорук турар. Бу соругу толорорго кылаас салайааччыта, төрөппүт уонна үөрэнээччи биир санаанан салайтаран, сыл устата былааннаах үлэни ыытыахтара диэн эрэнэбин. Сыл түмүгүнэн Ийэ тылы сайыннарыыга көхтөөхтүк, айымньылаахтык үлэлээбит кылааска “Бастыҥ кылаас” анал аат туттарыллыаҕа. Күндү доҕоттор! Саҥа үөрэх дьыла хас биирдиигитигэр саҥа арыйыылары, чаҕылхай ситиһиилэри, сырдык санаалары аҕаллын. Өй-билии кыһатыгар кынат анньынан, үрдүктэн үрдүк кирбиилэри дабайыҥ! Чөл доруобуйалаах, дьоллоох-саргылаах буолуҥ! Эҕэрдэни кытта, улуус баһылыга Василий Алексеев.