Дьокуускайдааҕы национальнай гимназия 3 "б" кылааһын оҕолоро, төрөппүттэрэ бэс ыйын 5-... — 7 июня 2026 г. в 06:46:03.646
Дьокуускайдааҕы национальнай гимназия 3 "б" кылааһын оҕолоро, төрөппүттэрэ бэс ыйын 5-6 күннэригэр төрөөбүт төрүт дойдубутун үөрэтэр "Мин сахабын" диэн проекпыт чэрчитинэн Таатта улууһун Чөркөөҕөр уонна Баайаҕатыгар 43 киһи буолан баран кэллибит. Наһаа киэҥ программалаах, оҕолорбутун элбэххэ үөрэтэр, саҥа сонун сирдэри көрдөрөр, айылҕалыын алтыһар, биир сомоҕо буолар, тулуурга үөрэтэр суолталаах, Моҕол ураһаны тутар үтүө санаалаах көмө акцияҕа кыттыһан, наһаа астык тэрээһиҥҥэ, бэккэ тэринэн баран кэллибит. Оҕолорбут өйдөрүгэр-санааларыгар туох эмэ кыра да саҥа билии иҥпит, саҥа толкуй киирбит буоллаҕына, биһиги тэрээһиммит сыалын сиппит. Учууталбытынар Ольга Вадимовнаҕа, барыбытын түмэр төрөппүппүтүгэр Любовь Григорьевнаҕа, сүүрбүт-көппүт, барсыбыт төрөппүттэргэ барыгытыгар махтал! Хата биһиги талыы талба Таатта сириттэн төрүттээх төрөппүттэр, бу айаммытынан төрүөт оҥостон, төрөөбүт сирбит саамай ытыктанар, кэпсээҥҥэ сылдьар сирдэрин-уоттарын, улуу киһибитин Мандар Ууһу көрсөн, илэ харахпытынан көрөн, илии тутуһан, улуу киһибититтэн алгыс ылан, бэйэбит эмиэ дьоллонон, астынан кэллибит! Айылҕабыт барахсан туран биэрэн, бу тэрээһиммит өссө кэрэ, үтүө өйдөбүлү өйбүтүгэр-санаабытыгар хаалларда. Түгэнинэн туһанан, биһигини үөрэ-көтө көрсүбүт, оҕолорбутун сахалыы эйгэҕэ сыһыарбыт, саҥа билиини-көрүүнү иҥэрбит Таатта улууһун Чөркөөхтөөҕү краеведческай музей, Баайаҕатааҕы Мандар киин, музей үлэһиттэригэр барҕа махталбытын этэбит! Эһиги сыралаах, туһалаах, сүрэххит сылааһын иҥэрбит, өркөн өйгүтүн уурбут үлэҕит саха дьонугар наһаа улахан суолталаах! Эһиги үлэҕитин сөҕө-махтайа көрдүбүт-иһиттибит. Саха Сирин историятын үйэттэн үйэҕэ, көлүөнэттэн көлүөнэҕэ кэпсиир, үөрэтэр, хаһан да умнуллубат курдук үйэтитэр сыаллаах үлэлии-хамсыы сылдьар дьоммутугар чэгиэн туругу, тус олоххутугар дьолу эрэ баҕарабыт! Махталы кытта 3 "б" кылаас үөрэнээччилэрэ, төрөппүттэрэ, кылаас салайааччыта Петрова Ольга Вадимовна