Биһиги төрөппүттэрбит үтүө холобурдара -гимназиябыт киэн туттуута!✨
Биһиги төрөппүттэрбит үтүө холобурдара -гимназиябыт киэн туттуута!✨ Бэҕэһээ, алтынньы 8 күнүгэр, Дьокуускай куорат «Патриот» ыччат киинигэр Саха Өрөспүүбүлүкэтин бастакы Бэрэсидьиэнэ Михаил Ефимович Николаев сырдык кэриэһигэр анаммыт II Өрөспүүбүлүкэтээҕи төрөппүт форума буолан ааста. Форумҥа төрөппүттэр, педагогтар, дириэктэр сүбэһиттэрэ, улуустааҕы координатордар уонна экспертэр түмсэн кытыннылар. Тэрээһини «Росдетцентр» ФГБУ «Оҕо саас навигатордара» эрэгийиэннээҕи ресурснай киинэ уонна Өрөспүүбүлүкэтээҕи төрөппүт кэмитиэтэ тэрийэн ыыттылар. Форум аһыллыытыгар үөрэх тэрилтэлэригэр көмөлөрүн, волонтердааһыны уонна дьиэ кэргэн көҕүлээһиннэрин сайыннарыы иһин көхтөөх төрөппүттэри бэлиэтээтилэр. Конкурс түмүгүнэн биһиги төрөппүттэрбит маннык үрдүк номинацияларынан наҕараадаланнылар: • 🌟 «Дьиэ кэргэн дуэта» — Ньургуйаана Дмитриевна уонна Егор Егорович Илларионовтар; • 💡 «Сыл көҕүлээһинэ» — Екатерина Васильевна Пинигина. Ону таһынан, Саха сиринээҕи (региональнай) төрөппүт кэмитиэтин бэрэссэдээтэлин солбуйааччытынан Екатерина Васильевна Пинигина анаммытын улахан киэн туттуунан биллэрэбит. Бу — кини гимназия эрэ буолбакка, бүтүн өрөспүүбүлүкэ уопсастыбаннай-оскуола сыһыаннарын сайыннарыыга киллэрбит улахан кылаатын үрдүктүк сыаналааһын уонна улахан эрэл бэлиэтэ буолар! Гимназия кэлэктиибин уонна үөрэнээччилэрин аатыттан Ньургуйаана Дмитриевнаны, Егор Егоровичы уонна Екатерина Васильевнаны ис сүрэхтэн эҕэрдэлиибит! Эһиэхэ уостубат эрчими, кытаанах доруобуйаны уонна кэлэр көлүөнэ кэскилин туһугар саҥа ситиһиилэри баҕарабыт!