📖🎊 *Үбүлүөйдээх тэрээһиннэр салҕаналлар* — 23 мая 2026 г. в 09:54:42.304
📖🎊 *Үбүлүөйдээх тэрээһиннэр салҕаналлар* Ыам ыйын 21 күнүгэр “Осикат” култуура киинигэр оройуоммут үбүлүөйдээх сылыгар аналлаах "Хотугу Муомабын күндүтүк саныыбын" альбом кинигэ сүрэхтэниитин тэрээһинэ ыытылынна. Бэлиэ күнү Киин библиотека сэбиэдиссэйэ Елена Терешкина бэрт сэргэхтик иилээн-саҕалаан тэрийэн ыытта. Элбэх дьон сэҥээриитин ылбыт кинигэ-альбому оройуон Дьаһалтата (баһ. Д.В. Аммосов) үбүлээн таһаартарбыт. Ол туһунан баһылык Дмитрий Викторович кэпсээтэ. Салгыы кинигэ таҥааччылар ааттарыттан Култуура управлениетын салайааччыта Юрий Черов кинигэни хайдах быһыылаахтык таҥан, бэлэмнээн таһаарбыттарын сиһилии сырдатта. Кинигэ "Муома" Аан айылҕа пааркатын үлэһитэ Иннокентий Федоров үйэтиппит хаартыскаларынан сиэдэрэйдик киэргэтиллибит. Альбом кинигэҕэ оройуон киэн туттар дьоно, суруйааччылар Николай Саввич Тарабукин, Василий Дмитриевич Лебедев, Мария Прокопьевна Федотова-Нулгынэт, Евдокия Николаевна Бокова, Николай Михайлович Черемкин - Момскай, суруналыыстар Тихон Егорович Черемкин - Толомон, Егор Слепцов - Буоратай, Екатерина Герасимова -Айнадь, Раиса Былбанаева, ону сэргэ айар талааннаах биир дойдулаахтарбыт истин иэйиилэрин, нарын санааларын уран тылынан хоһуйбут хоһоонноро, ол иһигэр олохтоох ааптардар ырыа буолан көтүппүт айымньыларын куар кодунан киирэн истиэххэ сөп. 📰 Тэрээһин туһунан сиһилии хаһыат кэлэр нүөмэригэр билсиэххэ сөп. @indigir_uottara