Новости · 7 июля 2026 г.

«Ниме - Халăх бюджечĕ». Юнкăсем - пуçаруллă тата активлă çынсем — 7 июля 2026 г. в 09:57:36.291

«Ниме - Халăх бюджечĕ». Юнкăсем - пуçаруллă тата активлă çынсем Юнкă тăрăхĕнче пуçаруллă та активлă çынсем пурăнаççĕ. Мана хамăр патри çынсем пуçарулăх ушкăнĕн ертÿçи пулма шанчĕç. Шанаççĕ пулсан вара манăн вĕсен шанăçне тÿрре кăларас пулать. Эпĕ территори пайĕнче водительте ĕçлетĕп. Эпир çитес çул Юнкă ялĕнчи Новая урамри 800 метра яхăн çула юсаса такăрлатасшăн. Пире çак çул питĕ кирлĕ, шкула каякан ачасене те, васкавлă пулăшу машинине те, пур тĕлĕшпе те кирлĕ. Проектăн пĕтĕмĕшле хакĕ 7 миллион та 800 пин тенкĕ. Ку проекта пурнăçлама халăхран 780 пин тенкĕ укçа пуçтартăмăр. Çынсем ăнланаççĕ ялта çул кирлине, укçа пухассипе те ĕç япăх мар иртрĕ. Çитес çул валли пирĕн территоринче ĕçсем татах пур. Хамăр тăрăхри çăва территорине карта тытса çавăрасшăн. Çак сăваплă вырăна пăхса, тирпейлесе тăмаллах пирĕн. Проект хакĕ 5 миллион тенкĕ. Çавăн пекех пирĕн территоринче тепĕр ача-пăча площадки тумалла. Проект хакĕ 1 миллион тенкĕне яхăн. Çак ĕçсем валли халăхран укçа пуçтартăмăр. Конкурс комиссийĕ юнкăсен активлăхне кура 2027 çул валли пирĕн проектсене ырласса шанатпăр эпир. Кăçал Юнкă территори пайĕнче 4 проект пурнăçланмалла. Пуçарулăх программи ĕçленипе вырăнти пурнăç лайăхланса, тирпейленсе пырать. Çакна çамрăксем те асăрхаççех пулĕ тетĕп. Яла çамрăксем ытларах юласса шанас килет. «Ниме - Халăх бюджечĕ» проектпа эпир питĕ кăмăллă. Ял çыннин пурнăç условийĕ лайăхланнине туйса тăратпăр эпир. Халĕ Юнкă территорийĕнчи пуçланă проектсем те, пуçламанни те пур-ха. Юнкăра спорт площадки тăвассипе ĕçсем вĕçленчĕç темелле. Унта футболла вылямалли вырăн пулать. Ку лаптăк та ялта кирлех, спортпа туслисем валли анчах мар, курма килес тата çакăнта уçăлса çÿрес текенсем валли те. Юнкăпуçĕнче пушар хăрушсăрлăх тĕлĕшпе пĕвене йĕркене кĕртрĕç. Ытти проект та пурнăçланасса шанатпăр. Александр ИЛУГИН. Юнкă ялĕ. Сăн ÿкерчĕкре: Юнкă ялĕнчи Новая урамри çак çула çĕнетесшĕн.