Улуус планеркатын сонуннарыттан — 3 августа 2026 г. в 09:27:35.389
Улуус планеркатын сонуннарыттан Бүгүн улуус баһылыга Алексей Иннокентьев үөрүүлээх быһыыга-майгыга СӨ норуоттарын IX Спортивнай оонньууларын спонсордарыгар сэртипикээттэрин туттарда. Маннык бэлиэ суругунан Михаил Захарович Нехоруков, Алексей Борисович Васильев, Илья Вячеславович Герасимов, Андрей уонна Светлана Даниловтар, бойобуой дьайыылар бэтэрээннэрин Ассоциацията, СВО кыттыылаахтарын кэргэттэрин «Ньурба ньургуһуннара» уопсастыбаннай түмсүү уонна «Чэлгийэр Ньурба» түмсүү спикердэрэ бэлиэтэннилэр. Олоҕу-дьаһаҕы хааччыйыы Хатыыттан 100-тэн тахса км ыраах сирдэргэ 3 ойуур баһаара регистрацияланна, умуруорар туһунан быһаарыы ылыллар. Күбэйиҥдэттэн97 кмсиргэ (Үөһээ Бүлүү) ойуур уота булулунна, Ньурбатааҕы Авиалесохрана 18 үлэһитин онно илтилэр. Ааспыт нэдиэлэҕэ Чкалов сиригэр сүппүт Акана нэһилиэгин олохтооҕо В.Е.Игнатьевы көрдүүр үлэ салҕанар. Быыһыыр сулууспаттан, Ис дьыала отделыттан уонна Акана, Хорула олохтоохторуттан – барыта 20 киһи бу үлэҕэ кыттар, ол иһигэр полицияттан ыттаах кинолог эмиэ баар. ОДьКХ Ньурбатааҕы филиалыгар Өрөмүөн бырагырааматынан үлэ бара турар. Матырыйаал 90% кэриҥэ кэлбит. Хамнаска иэстэрэ суох, уматык барыта кэлбит. Ууну хааччыйар эбийиэктэриттэн ураты атын эбийиэктэргэ уота суох олороллор. Уопсастыбаннай бэрээдэк Ааспыт нэдиэлэҕэ полицияҕа 85 сайабылыанньа, иһитиннэрии киирдэ. Араас эчэйиилэри ылан балыыһаҕа 9 киһи көрдөрүннэ. Административнай буруй – 26, киһи этин-сиинин эчэтии – 2, буруйу оҥоруу сибикитин булуу туһунан араапар – 1, кэнсэлэээрийэттэн кэлбит матырыйаал – 20, криминала суох 3 өлүк булулунна. Барыта 77 административнай боротокуол толорулунна, ол иһигэр ГАИ отделынан – 60, ыстарааптыыр стоянкаҕа 3 массыына туруорулунна, суоппар дастабырыанньата суох – 2, итирик туруктаах уруулга олорбут 1 киһи тутулунна. Киһи эчэйиитэ суох 3 ДТП буолла. Доруобуйа харыстабыла Ааспыт нэдиэлэҕэ Суһал мед. көмөҕө 86 ыҥырык киирдэ, өлүү – 6 (ол иһигэр 1 – бэйэҕэ тиийинии), төрөөһүн – 0, санрейс 1-дэ көттө. Клещкэ барыта 7 киһи ытыртарда, анаалыстарын түмүгэ кэлэ илик. Клещ 120-тэн тахса көрүҥэ баар, онтон 6 көрүҥэ дьааттаах. Улуустааҕы киин балыыһа ойуурга-тыаҕа тахсар дьону клещкэ ытыртарбат курдук таҥастарын көрүнэ сылдьалларыгар сүбэлиир. Сорох түгэҥҥэ улууска өлүү элбэҕэ ДИПИ-гэ атын улуустартан кэлбит кырдьаҕастар өллөхтөрүнэ эмиэ Ньурбаҕа суруллалларынан быһаарыллар. Дьокуускайтан клиническэй психолог уонна психиатр кэлэн дьону приемнаатылар, туһааннааҕынан 12 уонна 22 киһини көрдүлэр. Чопчу идэлээх исписэлиистэр тиийбэттэринэн сибээстээн, ЦРБ кылаабынай бырааһа Артем Ксенофонтов 7 эдэр исписэлииһи ординатураҕа үөрэттэрэ киллэрбиттэрин, 2 медик Ньурба к. уонна Маалыкайга үлэлии кэлиэхтээҕин иһитиннэрдэ. Булт сэрэбиэйэ Ааспыт нэдиэлэҕэ кыыллары бултуурга (бултанар кыыллар квоталарын 35%-на) сэрэбиэй ыытылынна. Бу түмүгүнэн улууска 122 кыыл табаны, 26 тайаҕы, 10 эһэни уонна 6 туртаһы бултуурга көҥүллэр хаһаайыттарын буллулар. Тыа хаһаайыстыбата Үөһээҥҥи 2 тэрилтэ холбоһон, ТХМ иһинэн Сиртэн үүнүүнү ылыы уонна мелиорация управлениета тэрилиннэ. Ньурбатааҕы мелиорация тэрилтэтэ үүнүүнэн эмиэ дьарыктанар буолан, этэҥҥэ чөллөөх хаалла. Атын 6 филиалга сарбыйыы ыытылынна. Мелиоратордарбытыгар 3 вакансия баар. Атырдьах ыйын 3 к. оперативнай субуокканан от былаана 30% туолла. Октябрьскай нэһилиэк Нэһилиэк салалтата Атах микро-оройуонугар уоту киллэриигэ үлэлэһэн, Тутуу министиэристибэтиттэн 17 мөл. сол. кэлиэхтээх. Куонкурус ыытыллан бэдэрээтчит быһаарыллыахтаах. КИО нөҥүө Производственнай уул. асфальтыырга быйылгы уонна эһиилги үлэлэргэ куонкурус биллэриллиэхтээх. Нефтебаза суолугар буор кутуллан ямочнай өрөмүөн саҕаланна. Нэһилиэк үгүс олохтооҕо оттоон бүтэн эрэр. Нэһилиэк стелата оҥоһуллуохтаах.