Маҥаныга Түмэл Балаҕан норуот күүһүнэн тутулунна — 24 июня 2026 г. в 07:44:52.977
Маҥаныга Түмэл Балаҕан норуот күүһүнэн тутулунна 🔹Бэс ыйын 21 күнүгэр Орто Сурт бөһүөлэгэр нэһилиэк историятын кэпсиир Түмэл Балаҕан арыллыытын үөрүүлээх тэрээһинэ буолла. Маҥаны нэһилиэгин түмэлэ улуус култууратын «Түмэллэр сайдыылара» муниципальнай бырагырааматын үбүлээһининэн, улууспут нэһилиэктэрин, Маҥаны нэһилиэгин дьаһалталарын өйөөһүннэринэн Түмэл Балаҕанын тутуутун матырыйаалыгар ороскуоттаммыта. Олохтоох дьаһалталара өйөөн, эр дьоннор түмсүүлэрин хамсатан үлэ саҕаламмыта, үгүс субуотунньуктары тэрийбиттэрэ. Балаҕан маһын кэрдэн, тиэйэн, акылаатын түһэрэн көҥдөйүн начаас туппуттара. Ис бараанын быйыл оҥордулар. Дьиэ ититиитин, уотун монтаһын, кырааскатын үлэтэ барыта нэһилиэнньэ күүһүнэн тутуллан үлэҕэ киирдэ. Нэһилиэк кэрэ аҥардара минньигэс аһылыгынан үлэһиттэри күндүлээбиттэрэ. Ким да туора турбакка, олохтоохтор бары түмсэн 132 кв м. иэннээх Түмэл Балаҕаны тутан үлэҕэ киллэрдилэр. 🔹Сахалыы сиэринэн саҥа тутууну Горнай улууһун, Маҥаны нэһилиэгин Бочуоттаах олохтооҕо, улуус духуобунай попечителэ Петр Гаврильевич Сивцев алгыс түһэрэн арчылаата. 🔹Саҥа Түмэл Балаҕаҥҥа киирэр, үөрүүлээх чааһын арыйарга аалай кыһыл лиэнтэни Горнай улууһун баһылыга Никита Викторович Андреев, Маҥаны нэһилиэгин тыа сирин түөлбэтин Аҕа баһылыга Михаил Николаевич Текеянов, М.Е. Тимофеев аатынан Бэрдьигэстээх кыраайы үөрэтэр түмэл директорын эбээһинэһин толорооччу Илона Васильевна Андреева үөрүүлээх быһыыга-майгыга быстылар, эҕэрдэ тылларын анаатылар. 🔹Нэһилиэк түмэлэ Бэрдьигэстээх түмэлин филиала буолар, уопуттаах Мария Ивановна Осипова айымньылаахтык салайар. 🔹Бэлиэ тэрээһиҥҥэ култуура уонна духуобунай сайдыы управлениетын салайааччыта Вероника Николаевна Быганова, нэһилиэк бэтэрээн сэбиэтин бэрэссэдээтэлэ, СӨ норуотун хаһаайыстыбатын үтүөлээх үлэһитэ Екатерина Михайловна Степанова, педагогическай үлэ бэтэрээнэ, нэһилиэк түмэлигэр үлэлээбит Пелагея Николаевна Баишева түмэл нэһилиэк култууратын, устуоруйатын үйэтитэр аналлаах, үүнэр ыччакка утуму салгыыр, үтүө үгэстэри иитэр сыаллаах үлэтэ инникитин кэскиллээх буоларыгар баҕа санааларын эттилэр. Үлэлэспит туруу олохтоохторго улуус, нэһилиэк махтал суруктара туттарыллыннылар. Саҥа Түмэл Балаҕан тутуута 🔹Сахабыт сиригэр биллэриллибит култуура сылыгар уонна олохтоох бэйэни салайыныы бастыҥ бырайыага буолбута ордук суолталаах уонна хайҕаллаах. 🔹Кэскиллээх бырайыак атын нэһилиэктэргэ тэнийдин, олоххо киирдин, үтүө холобур буоллун.