Бүгүн, от ыйын 1 күнүгэр, дойду үрдүнэн Байыаннай дьайыы ветераннарын күнэ бэлиэтэнэр. ... — 1 июля 2026 г. в 06:57:54.186
Бүгүн, от ыйын 1 күнүгэр, дойду үрдүнэн Байыаннай дьайыы ветераннарын күнэ бэлиэтэнэр. Бу бэлиэ күнү көрсө, бэс ыйын 29 күнүгэр Аһымаҕа (Кировскай нэһилиэгэр) Горнай улууһун байыаннай дьайыы кыттыылаахтарын уонна кинилэр дьиэ кэргэттэрин түмэр улахан тэрээһин буолан ааста. Улууспут баһылыга Никита Викторович Андреев хорсун буойуттарбытыгар, ветераннарбытыгар уонна кинилэр дьиэ кэргэттэригэр ис сүрэхтэн истиҥ эҕэрдэтин тиэрдэр. Кини бэйэтин тылыгар уолаттарбыт хорсун быһыыларын, хоодуот санааларын үрдүктүк сыаналаата, хас бирдии дьиэ кэргэҥҥэ кытаанах доруобуйаны, уостубат күүһү-уоҕу баҕарда. Ону тэҥэ, сулууспалыы сылдьар уолаттарбыт бары этэҥҥэ, кыайыылаах эргиллэллэригэр күүстээх эрэлин биллэрдэ. Олохторун толук уурбут дьоруойдарга улуус дьоно куруук сүгүрүйэр уонна ааттарын үйэтитэр. Тэрээһиҥҥэ Кировскай, Бэрдьигэстээх, Атамай, Октябрьскай, Маҥаны уонна Солоҕоон нэһилиэктэрин делегациялара улахан көхтөөхтүк кытыннылар. Бу күн Кировскай нэһилиэгин ыччаттарын күүһүнэн анал байыаннай дьайыы кыттыылаахтарыгар анаммыт саҥа стела арылынна. Ыччаттар улуустааҕы «Патриотика» конкурска кыайан 100 000 солкуобай грант ылбыттарын, бэйэ бюджетиттэн эбэн бу ураты паамытньыгы туруордулар. Сынньалаҥ пааркатыгар самаан сайын кэлбитинэн Алгыс сиэрэ-туома ыытылынна. Ону тэҥэ, дьоҥҥо туһалаах хайысханан "Барыта биир сиргэ" диэн акцияннан Горнайдааҕы киин балыыһа быраастара, психологтар, Социальнай фонда, Дьарыктаах буолуу киинэ, Россельхозбанк уонна социальнай харалта специалистара сылдьан анал приемнары, консультациялары тэрийдилэр. Уоппускаҕа кэлэ сылдьар уолаттарга улуус бочуоттаах наҕараадалара туттарылыннылар. Улуус байыаннай комиссара хорсуннук сэриилэһэн охтубут буойуттар ийэлэригэр «Хорсун быһыы иһин» орденнарын улахан ытыктабыллаахтык туттарда. Ыалдьыттарга саха таҥаһын парада, АК автоматы уонна магазины ыһыы-хомуйуу, воздушканан ытыы күрэхтэрэ тэриллэн ураты сэргэхсийиини аҕаллылар. Кировскай нэһилиэгин олохтоохторо туойтан, сиэлтэн оҥоһуктары оҥорууга уонна эмтээх оттору, фиточайдары туһаныыга интэриэһинэй маастар-кылаастары ыыттылар, араас оонньуулары тэрийдилэр. Тэрээһин хаартыскаларын ссылканнан көрүөххэ сөп: Байыаннай дьайыы ветераннарын тэрээһинэ - 2026 Тэрээһиҥҥэ кэлэн көхтөөхтүк кыттыбыт хас бирдии киһиэхэ барҕа махтал! ✨ 🚀Новости. События. Жизнь района. Подписывайтесь на нас в MAX и ВКонтакте