ҮРҮҤ ИЛГЭНИ ҮРҮЛҮТЭР ҮЛЭҺИТ ДЬОҤҤО ҮӨРҮҮНҮ БЭЛЭХТИИ
ҮРҮҤ ИЛГЭНИ ҮРҮЛҮТЭР ҮЛЭҺИТ ДЬОҤҤО ҮӨРҮҮНҮ БЭЛЭХТИИ От ыйын өҥүрүк куйааһын кытары аргыстаһан, айар айанньыттар иккис күммүтүгэр Хорообут нэһилиэгин, Суола үрэх үрдүгэр олохсуйбут Харыйалаах сайылыгар кэрэ кэнсиэр кэһиилээх тиийдибит. Айылҕа маанылаабыт кэрэ сиригэр олохсуйан "Хорообут" ХЭТ ыанньыксыттара бэрт тупсаҕай усулуобуйаҕа ынахтарын ыан, ыалынан сайылыы көһөн тахсан сайын кэрэтин билэн олороллор. Дьоммут - сэргэбит кэрэҕэ кыттыһан сэгэччи үөрэннэр, ытыс дохсун тыаһынан артыыстары айхаллыы көрүстүлэр. Кэнсиэр кэннэ айан дьонун маанылаах сандалынан айхаллаан, эбиитин ыалдьыттарга "Алаас ас" кэпэрэтиип салайааччыта Светоний Шестаков үрүҥ ас набордарын кэһиилээн үөрүүбүт үрдээтэ. Салгыы 1-кы Баатара нэһилиэгин В.В. Ноев аатынан култуура киинин сөрүүн уораҕайыгар кэнсиэрбит саҕаланна. Мэлдьи да буоларын курдук Бэдьимэлэр ырыа куттаах дьон артыыстары кытары ыллаһан сэгэччи кэнсиэри көрдүлэр. Бу эрэ кэнсиэргэ, Саха Өрөспүүбүлэкэтин үтүөлээх артыыһа, аан дойду виртуоз хомусчута, М. Н. Жирков аатынан музыкальнай колледж Г. Г. Колесов аатынан фольклор салаатын уһуйааччыта Варвара Степанова - Арчыына салайар сайыӈӈы уһуйаанын кыттыылаахтарын кытары көх-нэм буоланнар, кэнсиэр кэрэ киэргэлэ буоллулар. Салгыы, киэһээҥи ыам иннинэ кэнсиэри көрдөрөөрү айан дьоно "Долоон" сайылыкка ыксаатыбыт. Манна да дьоммут - сэргэбит олус кэтэһэн, баардарынан-суохтарынан артыыстары айхаллыы көрүстүлэр. Титиик тиэргэнигэр ынахтары хаайталаан баран, налыччы олорон ыанньыксыттар ырыа истэн дуоһуйдулар. Дьоммут барахсаттар, саха сиэринэн, ыһыах мааны сандалытын аһынан айах тутан, куораттан кэлбит дьоммутун кэһиилээн ыыттылар. Бу курдук, истиҥ сыһыан аргыстаах, ытыс дохсун тыаһа арыаллаах, бар дьон махталлаах айар айаммыт иккис күнэ түмүктэннэ. Салгыы айан аартыгар саҥа сирдэргэ эҕэрдэлии көрсөөрү ыанньыксыттар, отчуттар, тыа сирин бүгүрү үлэһит дьоно күүтэллэр. Бырайыак салайааччыта, СӨ култууратын туйгуна, СӨ Ырыа айааччыларын сойууһун чилиэнэ Галия Сосина