ТАТЬЯНА ЖИРКОВА ААТЫНАН III МАЙАТААҔЫ АҺАҔАС МАРАФОН
ТАТЬЯНА ЖИРКОВА ААТЫНАН III МАЙАТААҔЫ АҺАҔАС МАРАФОН Майа сэлиэнньэтигэр атырдьах ыйын 22 күнүгэр, бары билэр, киэн туттар киһибит, Аан дойду, Европа чөмпүйүөнэ, Арассыыйа успуордун үтүөлээх маастара, Арассыыйа уонна Саха Өрөспүүбүлүкэтин физическэй култуураҕа уонна успуорка үтүөлээх үлэһитэ, Саха Өрөспүүбүлүкэтин доруобуйатын харыстабылын туйгуна, Саха Өрөспүүбүлүкэтин чэпчэки атлетикаҕа федерациятын вице-бэрэсидьиэнэ, Нөөрүктээйи, Доллу нэһилиэктэрин уонна Мэҥэ Хаҥалас улууһун Бочуоттаах олохтооҕо Татьяна Жиркова аатынан III аһаҕас марафон үрдүк таһымнаахтык буолла. Үөрүүлээх арыллыыга улуус баһылыга Дмитрий Тихонов, Майа сэлиэнньэтин баһылыга Алексей Неустроев, марафон ааптара Александра Мохначевская, СӨ үп миниистирин солбуйааччы Николай Старостин уонна Арассыыйа успуордун үтүөлээх маастара Василий Егоров эҕэрдэ тылларын эттилэр. Тэрээһин биир чаҕылхай түгэнинэн киэҥ туттар дьоммут, успуорт бастыҥнарын ситиһиилэрин, кыайыыларын кэпсиир “Өрөгөй аартыга” быыстапка арыллыыта буолла. Сыанаҕа спорт бэтэрээннэрэ, өрөспүүбүлүкэ уонна Арассыыйа, Аан дойду араас көрүҥнэригэр чөмпүйүөннэрэ ыҥырыллан үөрүүлэрин үллэһиннилэр. Мустубут ыалдьыттарга, кыттааччыларга Татьяна Жиркова бэйэтэ сүүрүү иннинэ сэрээккэ ыытта. Бу тэрээһиҥҥэ Москуба, Мурманск, Дьокуускай куораттарыттан уонна өрөспүүбүлүкэбит араас муннуктарыттан успуорду, сүүрүүнү өрө тутар 700 киһи бары, эдэрдиин-эмэнниин, биир сомоҕо буолан, Майа киэҥ суолугар түмүстүлэр. Кыттааччылар эрдэттэн этиллибит араас уһуҥҥа суруйтарбыттара: 500 м, 1 км, 3 км, 5 км, 10 км, полумарафон 21,1 км уонна толору марафон 42,2 км. Кылаабынай судьуйанан Саха Өрөспүүбүлүкэтин үөрэҕириитин туйгуна, физическэй култуураҕа уонна успуорка туйгуна, Мэҥэ Хаҥалас улууһун чэпчэки атлетикаҕа сүрүн тириэньэрэ Дмитрий Павлов үлэлээтэ. Судьуйа сүрүн көмөлөһөөччүтүнэн Лариса Семенова буолла. Кыайыылаахтар мэтээлинэн, сыаналаах бириистэринэн наҕараадаланнылар. Марафону өйөөбүт урбаанньыттарбытыгар уонна тэрилтэлэрбитигэр дириҥ махталбытын тиэрдэбит: • “Якутия” авиахампаанньа • “Саха сирин тимир суоллара” акционернай хампаанньа • “СИС” киин • Саха Өрөспүүбүлүкэтин чэпчэки атлетикаҕа федерацията • “Уруу” ювелирнай хампаанньа • Мэҥэ Хаҥалас улууһун киин балыыһата (кылаабынай быраас Иннокентий Павлов) • “Майа-Аква” ыраас уу сулууспата (салайааччы Афанасий Решетников) • “Илин эҥэр” сынньалаҥ базата (салайааччы Ольга Скрябина) • “Олимп-мебель” маҕаһыын (салайааччы Ольга Иванова) • “Глянец” маҕаһыын (салайааччы Инна Лукина) • Урбаанньыт Ариан Мохначескай • “Модун-авто” маҕаһыын (салайааччы Михаил Холмогоров) • “Гараж” маҕаһыын Бу сүүрүүнү тэрийсибит, сүүрбүт-көппүт дьоммутугар барҕа махталбытын тиэрдэбит. Чөл олох уонна доруобуйа бырааһынньыга үтүө үгэскэ кубулуйан сылын ахсын ыытыллар биир бастыҥ тэрээһиммит буоларыттан үөрэбит. Утумнаах дьарыгы, тулууру, дьулууру, кытаанах санааны эрэйэр успуорт биир ыарахан көрүҥүнэн сүүрүүнэн дьарыктанар дьоммут, ыччаттарбыт кэккэтэ хаҥыы турдун! Хаартыскалары бу сигэнэн көр: https://drive.google.com/drive/folders/1CUyAqqjymv2gX3jioCGDDxPWuApXIavx?usp=sharing Мэҥэ Хаҥалас улууһун дьаһалтатын пресс-сулууспата