🎵 Уһук Илин устун гастроллара Майатааҕы оҕо ускуустубатын оскуолатыттан саҕаланна
🎵 Уһук Илин устун гастроллара Майатааҕы оҕо ускуустубатын оскуолатыттан саҕаланна 🎼 Атырдьах ыйын 26 күнүгэр М.К.Попова аатынан Майатааҕы оҕо ускуустубатын оскуолатыгар В.А.Босиков аатынан СӨ Муусука үрдүкү оскуолатын (институт) үөрэнээччилэрэ, учууталлара классическай муусука кэнсиэрин бэлэхтээтилэр. 🎷 Кэнсиэргэ Мичил Сыроватский салайааччылаах саксофонистар ансаамбыллара, Айсен Захаров виолончельга, Ситора Потапова кларнетка, Светлана Вдовенко фортепианоҕа нуучча уонна омук композитордарын айымньыларын толордулар. 🎺 Кэрэ, ураты тэрээһини эҕэрдэ тылынан Муусука үрдүкү оскуолатын (институт) ректора биир дойдулаахпыт Надежда Михайловна Зайкова арыйда. Бары кыттааччылар толорууларын көрөөччүлэр, истээччилэр ытыс дохсун тыаһынан доҕуһуоллаатылар. Надежда Михайловнаҕа улуустааҕы култуура уонна духуобунай сайдыы управлениетын начаалынньыгын солбуйааччы Александр Кулешов, М.К.Попова аатынан Майатааҕы оҕо ускуустубатын оскуолатын дириэктэрэ Василий Захаров өйдөбүнньүк бэлэхтэрин туттардылар. 🎙 Надежда Зайкова: – Бүгүҥҥүттэн балаҕан ыйын 4 күнүгэр диэри Арассыыйаҕа Сомоҕолоһуу, Саха Өрөспүүбүлүкэтигэр Култуура сылларын чэрчитинэн Дьокуускай куораттан Владивостокка тиийэ биһиги улахан гастролбут саҕаланна. Сүдү суолталаах айаҥҥа анаан бүтүн Уһук Илинтэн сүүмэрдэммит, 70 эдэр мусукаан кыттыылаах улахан симфоническай аркыастыр тэриллиннэ. Бэрэсидьиэн аппараатын ыҥырыытынан Владивосток куоракка буолар Бүтүн Арассыыйатааҕы экэниэмикэ пуорумугар кыттыыны ылабыт – атын дойдуттан кэлбит салайааччыларга, бизнесменнэргэ эдэр мусукааннар талааннарын көрдөрүөхтэрэ. Гастролбут М.К.Попова аатынан Майатааҕы оҕо ускуустубатын оскуолатыттан саҕаламмытыттан улаханнык долгуйабыт уонна үөрэбит, – диэтэ. 🎵 Василий Захаров: – Бүгүн оскуолабытыгар В.А.Босиков аатынан СӨ Муусука үрдүкү оскуолататын (институт) иитиллээччилэрэ бэртээхэй кэнсиэри көрдөрдүлэр, көрөөччүлэр олус астыннылар, үөрдүлэр. Кэнсиэрдиир бөлөххө Мэҥэ Хаҥаластан үөрэнэ сылдьар устудьуоннар бааллар. Салгыы гастролунан Благовещенскай, Хабаровскай уонна Владивосток куораттарга тиийиэхтэрэ. Сиһилии ⬅️ @gazetaerkeii @ulusmedia