Р.И. БРЫЗГАЛОВ ААТЫНАН ТРАНСПОРТНАЙ ТЕХНИКУМ — 15 СЫЛА
Р.И. БРЫЗГАЛОВ ААТЫНАН ТРАНСПОРТНАЙ ТЕХНИКУМ — 15 СЫЛА Бүгүн, балаҕан ыйын 28 күнүгэр, Аллараа Бэстээххэ дьоро күн үүннэ. Р.И. Брызгалов аатынан транспортнай техникум төрүттэммитэ 15 сыла. Бу күн хас да суолталаах түгэн холбуу тутан бэлиэтэннэ: * Техникум төрүттэммитэ 15 сыла; * Роман Иванович Брызгалов төрөөбүтэ 115 сыла; * Саха Өрөспүүбүлүкэтин Судаарыстыбаннаһын күнэ. 2011 сыллаахха балаҕан ыйын 26 күнүгэр, оччолорго Президент Вячеслав Штыров уурааҕынан Аллараа Бэстээххэ Транспортнай техникум төрүттэммитэ. 2020 сыл ыам ыйын 29 күнүгэр кыһаҕа биллэр судаарыстыбаннай диэйэтэл Роман Иванович Брызгалов аата иҥэриллибитэ. Үбүлүөйдээх тэрээһиҥҥэ ыҥырыылаах ыалдьыттар — Мэҥэ Хаҥалас улууһун уонна Аллараа Бэстээх дьокутааттарын сэбиэтин бэрэссэдээтэллэрэ Иннокентий Андросов уонна Сергей Оданец кыттыыны ыллылар. Кинилэр үлэһиттэргэ, устудьуоннарга истиҥ эҕэрдэлэрин тиэртилэр. Үөрэхтэригэр чаҕылхай көрдөрүүлээх устудьуоннарга Р.И. Брызгалов уонна А.А. Романов дьиэ кэргэттэрэ анал стипендиялары олохтоон туттардылар. Ону тэҥэ, успуорт күрэхтэрин түмүктэрэ таҕыста, бастыҥ спортсменнар наҕараадаланнылар. Тэрээһин Александр Афанасьевич Романов пааматынньыгар сибэкки дьөрбөтүн ууруу сиэринэн түмүктэннэ. Эдэр исписэлиистэри иитэн таһаарар кыһабыт өссө да үүнэ-сайда турдун! Мэҥэ Хаҥалас улууһун дьаһалтатын пресс-сулууспата