Күндү улууһум олохтоохторо!
Күндү улууһум олохтоохторо! Бүгүн - Саха Өрөспүүбүлүкэтигэр Судаарыстыбаннас күнэ! Барыгытын бу бэлиэ күнүнэн итиитик-истиҥник эҕэрдэлиибин! Өссө 1920 сыллаахха Саха сирин судаарыстыбаннаһын туһунан боппуруос күүскэ турбутун түмүгэр, 1922 сыллаахха В.И.Ленин тус дьаһалынан өрөспүүбүлүкэбитигэр Автономия статуһа иҥэриллибитэ. Онтон ыла, хаалыылаах, "эрэһээҥкитэ суох түрмэттэн", үөрэҕи баһылаабыт, сайдыы суолун тутуспут көлүөнэ үүнэн тахсыбыта. Ол кэминээҕи Саха сирин чулуу бэрэстэбиитэллэрин кэккэтигэр К.О.Гаврилов сырдык мөссүөнэ, киллэрбит кылаата бигэтик көстөр. Сэрии кэннинээҕи ыарахан сылларга төрөөбүт дойдубутун 15 сыл устата эрэллээхтик салайбыт биир дойдулаахпыт С.З.Борисов аатын бу күн эмиэ киэн тутта ааттыыбыт. Кини аатын кытта өрөспүүбүлүкэбит бары хайысхаларга саҥа таһымҥа тахсыытын быһаччы ситимниибит. Сахалартан бастакы Академик В.П.Ларионов уустук 90-ус сылларга бастакы Президеммит М.Е.Николаев соратнигын быһыытынан өрөспүүбүлүкэбит судаарыстыбаннаһа бөҕөргүүрүгэр оҥорбут үтүөтүн махталынан ахтабыт. Судаарыстыбаннай Суверенитет туһунан Декларация аҥардас Саха Өрөспүүбүлүкэтин тус суола буолбатах, бу - модун Арассыыйа бөҕөргүүрүгэр, атаҕар турарыгар саха норуота киллэрбит дьоһун укулаата буолар! Мантан сиэттэрэн атын регионнар Арассыыйа быстыспат сорҕото буолалларын туһунан элбэх сокуоннары, дьаһаллары ылыммыттара. Ону өйдүөх тустаахпыт. Бу адьас соторутааҕыта буолан ааспыт Госдумаҕа быыбардар мэҥэ-хаҥаластар сомоҕолоспуппутун, биир санаалаахпытын өссө төгүл бигэргэттилэр. Барыгытыгар этэҥҥэ буолууну, чөл туругу, ыра санааны, таһаарыылаах үлэни баҕарабын! Истиҥ эҕэрдэни кытта, Ил Түмэҥҥэ дьокутааккыт Андрей Находкин.