НӨӨРҮКТЭЭЙИГЭ КИИН ПААРКА ҮӨРҮҮЛЭЭХТИК АРЫЛЫННА
НӨӨРҮКТЭЭЙИГЭ КИИН ПААРКА ҮӨРҮҮЛЭЭХТИК АРЫЛЫННА Бүгүн, балаҕан ыйын 25 күнүгэр, Саха Өрөспүүбүлүкэтин Судаарыстыбаннаһын бэлиэ күнүн көрсө, Нөөрүктээйи нэһилиэгэр дьон-сэргэ сынньанар, эт-хаан чэбдигирдэр саҥа Киин пааркатын арыллыыта буолла. Бу баараҕай тутуу «Куорат табыгастаах эйгэтин тэрийии» федеральнай национальнай бырайыак чэрчитинэн олоххо киирдэ. Ыра санаа туолан, билигин нэһилиэк килбэйэр киинигэр дьиэ кэргэнинэн, эдэриттэн эмэнигэр тиийэ дуоһуйа сынньанар, оҕолор оонньуур былаһааккаларыгар күөлэһийэр кыахтаннылар. Үөрүүлээх чааска улуус баһылыгын инфраструктура уонна ОДьКХ боппуруостарыгар солбуйааччы Василий Филиппов, өрөспүүбүлүкэ архитектураҕа уонна тутууга салалтатын исписэлиистэрэ Ольга Мойтохонова, Майя Стручкова, Нөөрүктээйи нэһилиэгин баһылыгын солбуйааччы Альбина Кострамыкина истиҥ эҕэрдэлэрин тиэртилэр. Тэрээһин үөрүүлээх түгэнинэн саха эстрадатын чаҕылхай сулуһа Кэскил Баишев кыттыыта буолла. Ырыаһыт мустубут бар дьону эҕэрдэлээн, ыллам ырыаларын бэлэхтээн, бырааһынньык тыынын өссө көтөҕөн биэрдэ. Сайдыы суолун тутуһан, өссө да саҥаттан саҥа бырайыактары олоххо киллэрэн иһиэҕиҥ! Барҕа махталбытын биллэрэбит тутааччыларга, бырайыагы өйөөбүт дьоммутугар уонна бу үөрүүнү тэҥҥэ үллэстибит хас биирдиигитигэр. Мэҥэ Хаҥалас улууһун дьаһалтатын пресс-сулууспата