ВИТАЛИЙ АНДРОСОВ СЫРДЫК ААТЫН ҮЙЭТИТЭР ӨЙДӨБҮННЬҮК БҮҮҺЭ АРЫЛЫННА
ВИТАЛИЙ АНДРОСОВ СЫРДЫК ААТЫН ҮЙЭТИТЭР ӨЙДӨБҮННЬҮК БҮҮҺЭ АРЫЛЫННА Бүгүн Р.Г. Васильев аатынан улуустааҕы кыраайы үөрэтэр түмэл уһаайбатыгар ураты бэлиэ күн үүннэ. Сырдык, ыраас матыыптарынан саха омук кутун туппут биллиилээх композитор-мелодист, Арассыыйа суруналыыстарын сойууһун чилиэнэ, Саха Өрөспүүбүлүкэтин култууратын үтүөлээх үлэһитэ Виталий Тимофеевич Андросов сырдык аатын үйэтитэр өйдөбүнньүк бүүһэ арылынна. Бу долгутуулаах, үөрүүлээх түгэҥҥэ Виталий Тимофеевич чугас дьоно — оҕолоро, аймахтара, ыҥырыылаах ыалдьыттар муһуннулар. Бүүһү скульптор Аркадий Сивцев чочуйан оҥордо. Инникитин бу миэстэҕэ улууспут киэн туттар мелодистарын мөссүөннэрэ кэккэлэһиэҕэ. Үөрүүлээх тэрээһиҥҥэ Мэҥэ Хаҥалас улууһун дьокутааттарын Сэбиэтин бэрэссэдээтэлэ Иннокентий Андросов, Саха научнай киинин генеральнай дириэктэрэ, Арассыыйа билимин академига Михаил Лебедев, Саха АССР физическэй култууратын уонна успуордун үтүөлээх үлэһитэ, СӨ үөрэҕэриитин туйгуна Михаил Друзьянов, геолого-минерологическай билим хандьыдаата, урбаанньыт Дмитрий Сосин, Уус Алдан улууһун Бороҕоннооҕу оҕо ускуустубатын оскуолатын дириэктэрэ Борис Заровняев, Өрөспүүбүлүкэтээҕи суһал көмө киинин реанимация салаатын сэбиэдиссэйэ, төрөппүт уола, Дмитрий Андросов кыттыыны ылан, эҕэрдэлэрин, истиҥ ахтыы тылларын анаатылар. Бэлиэ күнү байаан доҕуһуоллаах алыптаах ырыаларынан СӨ норуодунай артыыһа Александр Емельянов, Амма улууһуттан Анна Акимова, Мария Кириллова киэргэттилэр. Тэрээһин түмүгэр Виталий Андросов өйдөбүнньүгэр сибэкки дьөрбөтүн уурдулар. Виталий Тимофеевич норуотугар анаабыт үтүө үлэтэ үйэлэргэ умнуллубат! Мэҥэ Хаҥалас улууһун дьаһалтатын пресс-сулууспата