Бүгүн, бэс ыйын 22 күнүгэр, улуус дьаһалтатын мунньахтыыр саалатыгар улуустааҕы дьиэ к... — 22 июня 2026 г. в 07:36:20.661
Бүгүн, бэс ыйын 22 күнүгэр, улуус дьаһалтатын мунньахтыыр саалатыгар улуустааҕы дьиэ кэргэн уонна ыччат отделын тэрийиилэринэн «Далбар Хотун» сурунаал бас редактора, Саха сирин суруйааччыларын, РФ суруналыыстарын Сойууһун чилиэнэ Айталина Константиновна Никифорованы уонна «Киэргэ» ювелирнай дьиэ дизайнер-худуоһунньуга, элбэх харысхал ааптара Саргылаана Иннокентьевна Барахованы-Ымыыны кытта истиҥ көрсүһүү ыытылынна. Бу иннинэ кинилэр улуус Баһылыга Валерий Валерьевиһы кытта анаан-минээн көрсөн, инники былааннарын ырыппыттара. Эрдэлии түһэн кэпсээтэххэ, биһиги, Үөһээ Бүлүүлэр, киэн туттар кыргыттарбыт Айталина Никифорова уонна Саргылаана Барахова-Ымыы бэс ыйын 24-25 күннэригэр ыытыллыахтаах Үрүҥ Тунах ыһыахпытыгар «Куорамыкы кыргыттара» түһүлгэни иилээн-саҕалаан ыытыахтара. Айталина Константиновна Саха сирин бастакы Президенэ М.Е. Николаев дьаһалынан 1994 тахсыбыт «Далбар Хотун» сурунаалга бас редакторынан үлэлиир. Бэйэтин үлэтин-хамнаһын туһунан мустубут кэрэ аҥардарга билиһиннэрэ олордоҕуна саалаҕа 2019 с. Үөһээ Бүлүүттэн кыттан Саха Өрөспүүбүлүкэтин Далбар Хотунун үрдүк сүкпүт Дария Павлова уонна быйылгы күрэх түмүгүнэн бу ытык түһүлгэҕэ номинация хаһаайкатынан буолбут Екатерина Спиридонова киирбиттэрин уруйдуу-айхаллыы көрүстэ. Айталина Никифорова уонна улууспут баһылыгын социальнай боппуруоска уонна дьиэ кэргэн политикатыгар солбуйааччыта Анна Уларовалыын эдэр саастарыттан билсэллэрин, чөл олоҕу тарҕатыыга күүстээх үлэни ыыппыттарын бэлиэтээн эттэ уонна истиҥ доҕордоһууларын, сырдык махталын бэлиэтигэр «Далбар Хотун» сурунаал буруолуу сылдьар нүөмэрин Анна Михайловнаҕа бэлэх уунна. Онтон Саргылаана Иннокентьевна Барахова-Ымыы сахаларга бастакынан харысхалы киэргэл оҥорбут, кылы киэргэлгэ холбообут дизайнер-худуоһунньукпут буолар. Бу дьарыгын 2014 с. саҕалаабыт. Кини: «Харысхал эт-сиин ойбонун барытын бүөлүүр. Саха кыыһа кэргэн тахсарыгар кэтэр саамай бастакы бэлиэтэ, олоҕун түстүүр сүрүн киэргэлэ», - диэтэ. Хас биирдии киһи олоҕо өбүгэлэрин олоҕуттан-дьаһаҕыттан улахан тутулуктааҕын туһунан Саргылаана Иннокентьевна туспа тутан эттэ. Кинилэр 2025 с. Санкт-Петербурга ыытыллыбыт этно-фестивальга бастакы миэстэни ылбыт, Россияны Холбоһуктаах Арабскай Эмираттарга Дубай куоракка баран көрдөрбүт ураты ситиһиилээхтэр. Билигин Саргылаана Барахова сүрүннээн хас биирдии киһи уратытын учуоттаан тус харысхаллары оҥорор. «Куорамыкы кыргыттара» түһүлгэҕэ Дора Васильева, Ольга Григорьева, Ольга Золотарева, Мария Петрова курдук аар-саарга аатырбыт Далбар Хотуттарбыт кыттыыны ылаллара күүтүллэр. Бу курдук сэргэх-истиҥ-иһирэх кэпсэтии бүгүн улууспут кэрэ аҥардарын түмэ тардан, улахан кэрэхсэбили, сэҥээриини ылла. Айталина Константиновна «Далбар Хотун» дьахталлар сообществолара өрүү аһаҕаһын, баҕалаах дьон хаһан баҕар киириэхтэрин сөбүн этэн туран, «Далбар Хотун» сурунаалга көхтөөхтүк сурутарга ыҥырда. Онто Саргылаана Иннокентьевна Саха сирин кэрэ аҥардара өрүү бииргэ түмсэн, сомоҕолоһон, бу олоххо кэрэни, сырдыгы эрэ айа-тута, сылдьар аналбытын үрдүктүк тутан, бииргэ сомоҕолоһон сылдьыаҕыҥ диэн ыҥыран туран, бэс ыйын 24 күнүгэр, киэһэ 5 ч. «Дорҕоон» түһүлгэҕэ «Куорамыкы кыргыттара» тэрээһиҥҥэ бука барыбытын ыҥырда. Күндүтүк саныыр, киэн туттар кэрэ бэйэлээх Далбар Хотуттарбытыгар Айталина Никифороваҕа уонна Саргылаана Бараховаҕа-Ымыыга этэҥҥэ буолууну, айымньылаах үлэлэригэр ситиһии эрэ сиэттиһэригэр, тус олохторугар дьол сыдьаайар, үөрүү-көтүү үктэллээх эрэ күннэри баҕара, алгыы хаалабыт! Көрсүөххэ диэри! Галина Васильева #ДалбарХотун #ҮрүҥТунахыһыах #Киэнтуттарбиирдойдулаахтарбыт