#бэлиэкүн — 12 июля 2026 г. в 07:15:01.004
#бэлиэкүн 🌾Бөтүрүөп күнэ 🌿Өбүгэ саҕаттан хороҕор муостааҕы, сыспай сиэллээҕи дэлэтэр туһуттан саха аймах ходуһаҕа Бөтүрүөп таҥара иннинэ эбэтэр от ситэн силигилээбитин кэннэ ый ортотун аһаран баран киирэр үтүө үгэстээхтэрэ. 🌿От охсуутун Бөтүрүөп таҥара иннинэ саҕалаабатахтарына, абааһылар мунньахтарын (от ыйын 13 күнүн) кэнниттэн охсоллоро. 🌿Оту муҥутуурдук охсуу Борокуоппайап күнүттэн (от ыйын 21 күнэ) саҕаланар. 🌿Ураты болҕомтону от ыйын 13 күнэ ылар – бу күн "Кунай хотуурдаах күнэ" эбэтэр "Абааһы мунньахтыыр күнэ" диэн ааттанар. Бу күн от охсуллубат. Номоххо кэпсэнэринэн, мунньахтыыр күннэригэр хотуур суолун таһаардахха, абааһы уола сырсар үһү. Сорохтор абааһылар биир күн, сорохтор үс түүннээх күн мунньахтыыллар диэн этэллэр. Онуоха от ыйын 13 күнүгэр салгыны мээнэ хамсаппакка, айдаарбакка, чуумпутук сылдьыллыахтаах. Дьиэҕэ-уокка уһуктааҕы-биилээҕи мээнэ туттубат, сэрэхтээх буолар сүбэлэнэр. 🌿От Ыйын Билгэлэрэ: 🍃От ыйын 12 күнэ — Бөтүрүөп күнэ. От сиэмэтэ ситэр, окко киирии, өҥүрүк куйаас, Бөтүрүөп ардаҕа түстэҕинэ, бурдук, отон, тэллэй дэлэй күһүнэ буолар. 🍃От ыйын 13 күнэ — Кунай хотуурдаах күнэ. Бу күн от охсуллубат – «Абааһы мунньахтыыр күнэ». 🍃От ыйын 14 күнэ — Оҕуруот сыыс отун ыраастааһын кэмэ. Бу күн ыраастаатаххына, өлгөм үүнүүнү ылыахха сөп. 🍃От ыйын 21 күнэ — Кус оҕото ситэр, дьэдьэн буһар, кэҕэ үчүгэй дьылга Борокуоппайапка диэри этэр. @taattagazeta @ulusmedia