🔹 Тожу кожууннуң Тоора-Хем суурда келир үениң уруглар садының тудуунуң эге дажын салыр... — 21 мая 2026 г. в 07:18:41.037
🔹 Тожу кожууннуң Тоора-Хем суурда келир үениң уруглар садының тудуунуң эге дажын салыр езулал болганын Тываның Баштыңы Владислав Ховалыг дыңнаткан. Регионалдыг эрге-чагырга база «Лунсин» КХН-нуң кады ажылдажылгазы-биле өөредилге чериниң тудуу эгелээн, ук объектиже 600 млн рубльди тускайлаан. Тыва Республиканың Чазааның Даргазының оралакчызы Алексей Сазан-оол, Тожу кожууннуң тус чер чагыргазының база «Лунсин» компанияның төлээлери тудуг ажылдарының эгелээнин демдеглээн байырлыг езулалга киришкен. Владислав Ховалыгның демдеглээни-биле алырга, уруглар садының тудуу тус чер чурттакчыларының үрде манааны чугула болуушкун, чүге дизе Тожу кожуунда школа назыны четпээн уруглар өөредилгези чидиг айтырыг бооп артпышаан. Кожууннуң өөредилге эргелелиниң бо чылдың май эгезинде сан-чурагайдан алгаш медеглээни болза, муниципалдыг школа назыны четпээн уруглар албан черлеринче оочурда 500 ажыг уруг бар, оларның 367-зи Тоора-Хем суурда. Оочур даңзызында уругларның көвей кезии - бичии бөлүктүң чаштары. Төлевилел езугаар 3 муң дөрбелчин метр шөлдү ээлээр уруглар албан чери 160 уругну хүлээп алыр ужурлуг. Тудугну 2027 чылдың чайын доозары планнаттынган. Владислав Ховалыг тудугнуң эгелээнин дыңнадып тура, бо социал ужур-дузалыг төлевилелди боттандырарынга киришкен кижи бүрүзүнге өөрүп четтиргенин илереткеш, уруглар сады өөрүшкүнүң, чогаадыкчы чоруктуң, бүгү талалыг сайзыралдың чери апаарынга, ол ышкаш тус черниң чурттакчыларынга он-он чаа ажылчын олуттар тургузарынга бүзүрелин илереткен. Россияның Президентизи Владимир Путинниң Кыдатче аалдап четкени-биле, кыдат партнерлар киришкен кады боттандырар төлевилелди эгелээни улуг ужур-уткалыг дээрзин Тываның Баштыңы айыткан. Владислав Ховалыгның бодалы-биле алырга, ол бүгү российжи-кыдат кады ажылдажылганың быжыг доңун болгаш үре-түңнелдиг чоруун бажыткап турар. 2025 чылдың апрельде Тыва Республиканың Чазаа биле «Лунсин» кызыгаарлаттынган харыысалгалыг ниитилел 2025-2045 чылдарда республиканың социал-экономиктиг хөгжүлдезинге кады ажылдажылга болгаш киржилге дугайында дугуржулганы чарганын сагындыраал. Ында кыдат инвесторларның бүдүрүлге ажылдарын чорудуп турар Тожу кожууннуң девискээринге социал инфраструктураны хөгжүдеринче угланган элээн каш социал инициативаларны боттандырары көрдүнген.