Дуобат күүрүүлээх киирсиитэ Ыһыах түһүлгэтигэр!♟️ — 21 июня 2026 г. в 04:50:08.581
Дуобат күүрүүлээх киирсиитэ Ыһыах түһүлгэтигэр!♟️ Бэс ыйын 20 күнүгэр, Ньурба улууһун Ыһыаҕын чэрчитинэн быыстапкалыыр түһүлгэҕэ өй күүһүн, сытыы толкуйу эрэйэр дуобат күрэҕэ сүрдээх сэргэхтик буолан ааста. Бу күрэх саха норуотун аатырбыт дуобаччыта, өрөспүүбүлүкэҕэ дуобакка бастакы үтүөлээх тренер Семен Семенович Николаев үбүлүөйдээх сылыгар ананан, кини сырдык аатын үйэтитэр сыаллаах ыытылынна. Уопсайа 18 дуобаччыттар түһүлгэҕэ киирсиигэ кыттан, дуобат үрдүк ускуустубатын дьоҥҥо-сэргэҕэ көрдөрдүлэр. Күрэх түмүгүнэн 3 миэстэни А.Н. Чусовской аатынан Ньурбатааҕы тэхниичэскэй лиссиэй Тимур Кириллин ылла, 2 миэстэни С.В. Васильев аатынан Ньурбатааҕы элбэх хайысхалаах гимназия үөрэнээччитэ Саина Герасимова уонна 1 миэстэни СӨ норуотунай артыыһа Борис Иванович Борисов. В.Н. Васильев анал бирииһин С.В. Васильев аатынан элбэх хайысхалаах гимназия үөрэнээччитигэр Тимофеева Дайаанаҕа туттардылар. Итиэннэ, бу тэрээһини тэрийэргэ улахан көмөнү оҥорбут, бириистэри туруорбут үтүө дьоммутугар, С.С. Николаев төрөппүт кыыһыгар Виктория Семеновна Николаеваҕа, дуобат уонна саахымат федерациятын бэрэссэдээтэлигэр Эдуард Николаевич Мярикяновка, Василий Николаевич Васильевка уонна күрэххэ кыттыбыт бары кыттааччыларга, көрөөччүлэргэ барҕа махталбытын тиэрдэбит! Дуобат үйэлэргэ умнуллубат, өйү сайыннарар оонньуу буолан өрүү сайда турдун! Түмэл пресс-сулууспата @nyurba_museum