Мэӈэ Хаӈалас улууһун Суола-Мэлдьэхси нэһилиэгэр сахалыы кылыһахтаах ырыа-тойук, хомус а...
Мэӈэ Хаӈалас улууһун Суола-Мэлдьэхси нэһилиэгэр сахалыы кылыһахтаах ырыа-тойук, хомус алыптаах дорҕооно дьиэрэйэр сайыӈӈы уһуйаана быйыл сайын үһүс төгүлүн ыытыллар. Мэҥэ Хаҥаласка үлэбинэн бара сылдьан, уһуйааччылары, кыттааччылары кытта көрсөн кэпсэппитим. Ол курдук, саха балаҕаныгар төрүт үгэскэ үөрэниэн баҕалаах саха далбар хотуттара кэлэн үөрэнэллэр эбит. Ыллыырга уонна хомуска оонньуурга сөптөөх тыыныыга эрчиллэн, сахалыы ырыа арааһын, тойук, оһуохай түөлбэнэн уратыларын үөрэтэллэр. Ону таһынан, төрүт иис абылаӈар умсугуйан, кыбытык тигиини уонна сиэлинэн ситии хатыытын баһылыыллар. Саха балаҕаныгар былыргы өбүгэлэрбит олохторун санатан олоӈхо уонна кыл кылыһах дорҕоонун истэн дуоһуйаллар. Уһуйааны аан дойду виртуоз хомусчута, аан дойду култууратын маастара, СӨ үтүөлээх артыыската, Дьокуускайдааҕы М.Н. Жирков аатынан музыкальнай колледж Г.Г. Колесов аатынан фольклор салаатын уһуйааччыта Варвара Степанова - Арчыына иилээн-саҕалаан ыытар. Бу уһуйааҥҥа норуот маастара Татьяна Парфенова кэлэн, таӈас кырадаһыннарын аттаран симэх оӈорорго үөрэппит. Саха төрүт утаҕын тары хайдах оӈорору Екатерина Копырина - Кэтириис кэлэн кэпсээбит. Ону тэӈэ, Сахабыт сиригэр үүнэр араас эмтээх үүнээйилэр туһаларын уонна хайдах хомуллалларын туһунан Виктория Петрова кэпсээн, көрдөрөн, Мэлдьэхси кэрэ сириттэн эмтээх үүнээйини хомуйбуттар. Кыбытык тигиини Мэӈэ Хаӈалас улууһун норуот маастара Маргарита Васильевна Степанова, сиэли хатан ситии өрүүтүн маастар Ирина Васильевна Шарина үөрэтэллэр эбит. Төрүт өбүгэбит үгэһин үйэтитэн үчүгэй тэрээһин сыллата тэриллэрэ кэрэхсэбиллээх. Айымньылаах уонна таһаарыылаах үлэҕит иһин барҕа махталбын тиэрдэбин! Афанасий Ноев