Август ае якташ каләм ияләренең туган көннәренә бай ай.
Август ае якташ каләм ияләренең туган көннәренә бай ай. Нуриев Вакыйф Вәкил улы 1958 елның 17 августында районыбызның Сеҗе авылында туа. Үз авылларында урта мәктәпне тәмамлаганнан соң 1975 елда Казан дәүләт университетының журналистика бүлегенә укырга керә. Бишенче курста укыган вакытта “Яшь ленинчы” газетасы редакциясендә хезмәткәр булып эшли, 1980 елда университетны тәмамлагач, корреспондент була. Аннары җаваплы сәркатип, баш мөхәррир урынбасары вазыйфаларын башкара. 1987 – 1990 елларда Вакыйф Нуриев – Татарстан китап нәшриятының сәясәт бүлеге мөдире була. 1990 елда аны яңа оешып килгән “Шәһри Казан” редакциясенә эшкә чакыралар. Ул башта бүлек мөхәррире, 1995 елдан 2000 елга кадәр әлеге газетада баш мөхәррир урынбасары була. 2000-2007 елларда “Салават күпере” һәм “Сәхнә” журналларының баш мөхәррир урынбасары булып эшли. Ә бүгенге көндә Вакыйф Нуриев “Казан утлары” журналының бүлек мөхәррире вазыйфасын башкара. 1980 еллар башында мәктәп укучылары өчен хикәяләр яза башлаган Вакыйф Нуриев “Сабантуй”, “Шәһри Казан” газеталарында, “Салават күпере”, “Ялкын”, “Мәгариф”, “Чаян” журналларында басылган бик күп кызыклы хикәяләр авторы. 1991 елда аның “Бүре кадәр бүрек” дигән хикәяләр җыентыгы, 2003 елда “Җәйгә кайда рәхәт?”, урта һәм югары педагогик уку йортлары өчен чыгарылган “Татар балалар әдәбияты”, 2005 елда “Ана догасы”, 2007 елда “Җиденче палата”, 2012 елда рус телендә “Седьмая палата”, 2018 елда “Ни хәлең бар, балам?..” исемле китаплары дөнья күрде. Язучы, журналист Вакыйф Нуриев 2004 елдан Татарстан Язучылар берлеге әгъзасы. Татарстанның атказанган мәдәният хезмәткәре, Татарстан Язучылар берлегенең Абдулла Алиш, Фатих Хөсни исемендәге әдәби премияләр, Татарстан Республикасының “Фидакарь хезмәт өчен” медале иясе. Бүгенге көндә Казан шәһәрендә яши һәм иҗатын дәвам итә. Туган көнегез котлы булсын, хөрмәтле Вакыйф абый, исән-имин яшәгез, иҗатыгызда зур уңышлар телибез! #АрскКультура #ӘдәбиятҺәмСәнгатьМузее #КазанАртыМузее