Музей музыки и фольклора народов Якутии им. А.П. Решетниковой
Лайфстайл · 21 мая 2026 г.
Ытыктабыллаах Саха сирин олохтоохторо!
Ытыктабыллаах Саха сирин олохтоохторо! Саха Өрөспүүбүлүкэтигэр Ырыа күнүнэн истиҥник эҕэрдэлиибин! Ырыа – биһиги култуурабыт быстыбат сороҕо, ырыаҕа норуот дууһата, устуоруйата уонна үгэстэрэ түмүллүбүттэр. Ырыа духуобунай нэһилиэстибэни үйэтитэр уонна кэнчээри ыччакка тириэрдэр, омук быһыытынан бэйэни билиниигэ уонна көлүөнэлэр сомоҕолоһууларын бигэ тирэҕэ буолан, биһиги өрөспүүбүлүкэбитигэр ураты суолталаах. Хоту дойдубут норуоттарын ураты матыыптаах, дириҥ өйдөбүллээх уонна туохха да тэҥнэммэт ырыаларынан биһиги киэн туттабыт. Ырыа сүрэхпитин үөрүүнэн уонна истиҥ санаанан толорон, хас биирдии дьиэҕэ бырааһынньык, үөрүүлээх түгэн ахсын кутуллар. Ийэ дойдубут ырыалара биһиги көмүскээччилэрбит санааларын бөҕөргөтөн, дойду туһугар охсуһалларыгар күүс буолаллар. Өрөспүүбүлүкэ ырыаҕа үгэстэрэ кичэллээхтик харыстаналлар эрэ буолбакка, сайдаллар, инникигэ кынаттыыллар. Култуура тэрилтэлэрин 1 467 ырыа кэлэктиибигэр кыра оҕоттон саҕалаан сыана үтүөлээх маастардарыгар уонна хуорунан ырыа бэтэрээннэригэр тиийэ 18 тыһыынчаттан тахса киһи дьарыктанар. Ырыа улуу күүһүн норуот билиниитэ манна көстөр! 47 ырыа норуодунай кэлэктиибэ – 18 хуор уонна 29 ансаамбыл – ураты киэн туттуубут. Чурапчы оройуонун Чыаппаратааҕы эр дьон хуора уонна Уус Алдан оройуонун “Кэнчээри” оҕо ансаамбыла “Россия Федерациятын үтүөлээх кэлэктиибэ” үрдүк ааты сүгэллэр. Бу үөрүүлээх күҥҥэ бэйэтин сүдү талаанынан уонна сыралаах үлэтинэн ырыа сайдарыгар сыратын уурар ырыа айааччыларга, ырыа толорооччуларга, аккомпаниатордарга, хормейстердарга, фольклору хомуйааччыларга, педагогтарга уонна кэрэни кэрэхсиир бары үлэһиттэргэ дириҥ ытыктабылбытын тиэрдэбит. Бүгүн Ырыа күнүн өрөспүүбүлүкэ бүттүүнэ бэлиэтиир. Дьокуускайга ыытыллар үгэс буолбут улахан бырааһынньыктааҕы кэнсиэр “Саха” көрөдөрө-иһитиннэрэр хампаанньа ханаалыгар көстөр. Өрөспүүбүлүкэбит араас муннуктарыгар олорор ырыаны таптааччылар бырааһынньыктааҕы кэнсиэри көрөн, Саха сирин бастыҥ ырыаһыттарын талааннарыгар сүгүрүйүөхтэрэ, астына ыллаһыахтара. Ырыа сүрэхтэри холбуур, кэрэҕэ эрэли үөскэтэр алыптаах күүстээх. Күндү Саха сирин олохтоохторо, эһиэхэ эйэни уонна этэҥҥэ буолууну, кытаанах доруобуйаны, айар үлэҕитигэр ситиһиилэри, саҥа ырыалары баҕарабын! Саха Өрөспүүбүлүкэтин Ил Дархана Айсен Николаев Подробнее: https://www.sakha.gov.ru/news/49343