Октябрь 27-де, Улуг-Хемниң Торгалыг сумузунуң ном саңынга, ТР-ниң Улустуң чогаалчызы ба...
Октябрь 27-де, Улуг-Хемниң Торгалыг сумузунуң ном саңынга, ТР-ниң Улустуң чогаалчызы база тыва литературада балалбас исти арттырып каан Эдуард Баирович Мижиттиң адын тывыскан «Энчээм болган төрээн чонум кезээ-дир мен» деп байырлыг хемчег болуп эрткен. База ол ышкаш, Э. Б. Мижиттиң адын мөңгежидип, ооң чажындан тура ойнап өскен бажыңынга мемориалдыг самбыраны аскан – бо хемчеглер чогаалчының 65 харлаан оюнга тураскаттынган. Төөгүлүг хемчегге А. С. Пушкин аттыг Национал ном саңының чурт-шинчилел чогаалының килдизиниң ажылдакчылары «Ховар салым-чаяанныг чогаалчы» деп аттыг номнар делгелгезин көргүзүп, келген чонга таныштырган. Онзагай байырлалга Э. Б. Мижиттиң өөнүң ишти Л. Мижит, Тываның Улустуң чогаалчызы Н. Куулар, ТР-ниң Чогаалчылар эвилелиниң кежигүнү, шүлүкчү Ю. Туң-оол, Национал хөгжүм-шии театрының сураглыг артистери болгаш ыраажы, композитор А. Арат-оол, Тываның Улустуң хөөмейжизи А. Барынмаа, Улуг-Хем кожууннуң аныяк ыраажылары, «Уран» бөлүүнүң ыраажызы С. Ооржак, Торгалыг школазының өөреникчилери, чогаалчының чоок кижилери, төргүл-төрели идепкейлиг киришкеннер. Көдээ клубтуң сценазынга чогаалчының бижээн шиилериниң үзүндүлерин, чоннуң ынак ырыларын, шүлүктерин аалчыларга, суурнуң улуг-биче чонунга онза-солун кылдыр бараалгаткан. Ук хемчегге Э. Мижиттиң кады ажылдап чораан эш-өөрү, төргүл-төрели, мөгейикчилери чогаалчы дугайында чылыг-чымчак сактыышкыннарын чонга чугаалап сонуургатканнар. ТР-ниң Улустуң чогаалчызы, ТР-ниң уран чүүлүнүң алдарлыг ажылдакчызы, шылгараңгай шүлүкчү, шиичи, прозачы, очулдурукчу, чогаал шинчилекчизи, редактор, сценарист Эдуард Баирович Мижиттин чырык адын төөгүге мөңгежиткенинге ооң өөнүң ишти Людмила Мижит база төргүл-төрелдери өөрүп четтиргенин илереткен.