«Саха дорҕооно» диэн саҥа бырайыак сүрэхтэннэ — 11 февраля 2026 г. в 09:44:42.160
«Саха дорҕооно» диэн саҥа бырайыак сүрэхтэннэ Төрөөбүт тыл уонна сурук-бичик күнүн чэрчитинэн Кыыл Уола аатынан Үҥкүү тыйаатыра «Саха дорҕооно» диэн саҥа бырайыагы сүрэхтээтэ. «Сүрүн сыалбыт-сорукпут – оҕо уһуйаантан саҕалаан төрүт дорҕооҥҥо чугас буоларыгар, төрөөбүт тылын сөпкө туттан саҥарарыгар, кыратыттан саха омуга ураты ырыаларын-тойугун билэ улаатарыгар, Олоҥхобутунан, Ыһыахпытынан киэн тутта үүнэригэр туһуланар», - диэн бырайыак ааптара, «Кыл Саха» төрүт дорҕоон бөлөҕүн салайааччыта, СӨ үтүөлээх артыыһа Анна ТОМСКАЯ кэпсээтэ. Аан бастакынан бу ураты кэпсэтии-кэнсиэри Дьокуускайдааҕы «Кэскил» оҕо уһуйаанын иитиллээччилэрэ олус истиҥник, сэргээн, сэҥээрэн көрдүлэр. Төрөөбүт тыл төрүт дорҕоону кытта дьүөрэлэстэҕинэ тиийимтиэ буоларын «Кыл Саха» төрүт дорҕоон бөлөҕө, тыйаатыр артыыстара: олоҥхоһут уонна оһуохайдьыт – Дмитрий АРТЕМЬЕВ, тойуксут-ырыаһыт – Александр КАРМАНОВ, хомусчут уонна көрсүһүүнү көҕүлээччи - Василена ШАРИНА – Улан көрдөрдүлэр. Оҕолор саха төрүт үстүрүмүөннэрэ кылыһах-кырыымпаны, тойон-кырыымпаны, хомуһу, күпсүрү, айааны кытта билистилэр, хайдах ыллыылларын, доҕуһуоллуулларын, кэпсииллэрин, тыаһыылларын иһиттилэр. «Хас биирдии нүөмэр оҕолорго сөптөөх гына таҥыллыбыта олус кэрэхсэбиллээх. Оҕолорбут фольклор араас көрүҥүн барытын биллилэр. Тыйаатыр үлэһиттэригэр кэлэн оҕолору сэргэхсиппикитигэр, сахалыы тыыҥҥа үөрдэ-көтүтэ уһуйбуккутугар махтанабыт», – диэн уһуйаан үлэһиттэрэ астыммыттарын биллэрдилэр. «Саха дорҕооно» бырайыак сырдык санаанан 160 оҕо астыммыт куолаһыттан, үөрбүт хараҕыттан дириҥ суолталаах саҕаланна. Бу бырайыак уһуйаан иитиллээччилэрин, алын сүһүөх кылаас үөрэнээччилэрин бырагырааммаларыгар сөп түбэһэр. https://max.ru/id1435026670_gos