Көжегени хуулгаазын эжик ышкаш,
Көжегени хуулгаазын эжик ышкаш, Көрүкчүнуң мурнун орта ажа тырткаш Сагыш-сеткил оранынче чүректерни Чалгынналдыр, театр, сен ужудар сен! Өөрүшкүнү, муңгаралды оттурбушаан, Өшпес от дег, ынакшылды, идегелди Өргүн чонга өргүл кылдыр сөңнеп чоруур Өндүр бедик театр, сен ыдыкшы-ла! Карак чажы бүлдеш кынныр Хайыраан бот, Кара-Дагны турлаг кылган Самбажык-даа, Күлтегин-даа, Сүбедей-даа, театр, сээң Күчү-күжүң ачызында дириг чоруур! Чечекти-даа, челээшти-даа дылдыг кылгаш, Сеткил оттур угаан-бодал көрүжүңге Делегейни, кижи хөңнүн чырыдыптар Театр, сен - дээди шынның херели сен! Эдуард Мижит 💙Эргим чонувус! Уран чүүлдүң өңнүктери! ✨Силер бүгүдени Тываның улустуң чогаалчызы Эдуард Байырович Мижиттиң «Мээң дазылдарым» деп уран-чечен делегейинче чалап тур бис! Чогаалчының театр, поэзия, хөгжүм болгаш сам уран чүүлүнге чаяап каан хөй талалыг байлак өнчүзүнүң дээжилерин чоннуң ынак артистери ойнап, номчуп, ырлап, самнап бараалгадыр. 🎤Концерттиң киржикчилери – Тываның национал хөгжүм-шии театры, Тыва национал оркестр, Тываның күрүне филармониязы, «Саян» театры, Тываның ойнаар-кыстар театры, «Тыва» ансамбли, Симфониктиг оркестр, Кызылдың уран чүүл колледжи, сураглыг артистер Луиза Мортай-оол, Олег Сат, Саяна Сат, Борбак-оол Салчак, Орлан Оюн, Андрей Монгуш, Ай-Хаан Ооржак, Аржаана Стал-оол, Уран-оол Стал-оол, Елена Куулар, Экер Кара-Сал, Чолдуг Ховалыг болгаш өскелер-даа. Болур хүнү, шагы – октябрь 14-те 18:00 шакта Болур чери – Улусчу чогаадылга бажыңы