Святитель Лука (Войно-Ясенецкий), архиепископ Симферопольский и Крымский, священноиспов... — 11 июня 2026 г. в 13:01:50.785
Святитель Лука (Войно-Ясенецкий), архиепископ Симферопольский и Крымский, священноисповедник. Тропарь, глас 1 Возвести́телю пути́ спаси́тельнаго,/ испове́дниче и архипа́стырю Кры́мския земли́,/ и́стинный храни́телю оте́ческих преда́ний,/ сто́лпе непоколеби́мый, Правосла́вия наста́вниче,/ врачу́ богому́дрый, святи́телю Луко́,/Христа́ Спа́са непреста́нно моли́/ ве́ру непоколеби́му правосла́вным дарова́ти// и спасе́ние, и ве́лию ми́лость. Кондак, глас 1 Я́коже звезда́ всесве́тлая, доброде́тельми сия́ющи,/ бы́л еси́, святи́телю,/ ду́шу же равноа́нгельну сотвори́,/ сего́ ра́ди святи́тельства са́ном поче́тся,/ во изгна́нии же от безбо́жных мно́го пострада́,/ и непоколеби́м ве́рою пребы́в,/ враче́бною му́дростию мно́гия исцели́л еси́./ Те́мже ны́не честно́е те́ло твое́ от землены́х не́др обре́тенное ди́вно Госпо́дь просла́ви,/ да вси́ ве́рнии вопие́м ти́:/ ра́дуйся, о́тче святи́телю Луко́,// земли́ Кры́мския похвало́ и утвержде́ние. Молитва О, святи́телю Луко́, испове́дниче и уго́дниче Христо́в! Услы́ши нас, гре́шных, со умиле́нием припа́дающих к ра́це честны́х и многоцеле́бных моще́й твои́х, и принеси́ моли́тву на́шу к Ми́лостивому Человеколю́бцу Бо́гу, Ему́же ты ны́не со все́ми святы́ми предстои́ши. Испроси́ у Христа́ Бо́га на́шего, коему́ждо дар благопотре́бен и вся, я́же ко спасе́нию поле́зная, да утверди́т ны в ве́ре Правосла́вней и благоче́стии, я́ко изба́вльшеся от ко́зней лука́ваго, избе́гнем вся́кия вражды́, нестрое́ний, ересе́й и раско́лов. О, цели́телю преди́вный и врачу́ безме́здный! Уврачу́й благода́тию, да́нной тебе́ от Бо́га, я́звы душ и теле́с на́ших, да не неисцеле́ни оты́дем из сей жи́зни вре́менней, но да чи́сти и непоро́чни предста́нем Престо́лу Бо́жию, прославля́юще Отца́ и Сы́на и Свята́го Ду́ха во ве́ки веко́в. Ами́нь.