💠 Күндү Бүлүү улууһун олохтоохторо, ытык-мааны ыалдьыттар! — 19 июня 2026 г. в 23:52:05.493
💠 Күндү Бүлүү улууһун олохтоохторо, ытык-мааны ыалдьыттар! Бүлүү улууһун дьаһалтатын уонна тус бэйэм ааппыттан эһигини Үрүҥ тунах ыһыаҕынан, самаан сайын салаллыбытынан, күөххэ үктэммиппитинэн итиитик-истиҥник эҕэрдэлиибин! Саха дьоно самаан сайын салаллан кэлэр үөрүүлээх күнүгэр үрдүк Айыылартан алгыс ылан, Ийэ сир Иччилэрин маанылаан аһатан, түптэ күөх унаар буруотун тарҕаччы унаардан, Дьөһөгөй оҕо күндүлүүр үүтүттэн кырылыы кыынньыбыт утаҕынан эмсэхтэнэн, Күн Айыы бэлэхтиир илгэлээх астарынан аһаан, ат сүүрдүүтүн, бөҕөстөр күрэхтэрин дуоһуйа көрөн, өйү-төйү саамылаан сааһылаан, былыргы дьыллар сахтарыттан илдьэ кэлбит үтүө үгэстэрин күн бүгүнүгэр диэри аныгы кэм сахалара илдьэ кэллибит. Быйылгы Үрүҥ Тунах Ыһыахпыт ананар улууска биллэриллибит Утум уонна үүнүү-сайдыы сылыгар уонна Бүлүү улууһун култууратын эйгэтигэр Ийэ олоҥхоһут Василий Осипович Каратаев – Харатай Баһылай төрөөбүтэ 100 сылыгар. Биир сомоҕо буола түмсэн, төрөөбүт Бүлүүбүт, Сахабыт сирэ үүнэ-сайда турарыгар бары айымньылаахтык үлэлиэҕиҥ, үүнүөҕүҥ-сайдыаҕыҥ, иннибитигэр туруоруллубут соруктары толорорго, дьон-сэргэ олоҕун тупсарарга, мындыр, кыахтаах омук буоларга дьулуһуохха! Бу үүммүт сайын бука барыбытыгар Эйэни, уйгуну-быйаҥы, үтүө түмүктээх үлэни, үгүс үөрүүлээх түгэни тосхойдун! Ыһыахха этиллибит алгыс үрдүк ситиһиилэргэ кынаттаатын, кэскилбитин түстээтин! Бу күн үчүгэйи, кэрэни аҕаллын! Бар дьоммор кытаанах доруобуйаны, дьолу-соргуну, ситиһиилэри баҕарабын! Уруй-туску, айхал — мичил! Бүлүү улууһун аҕа баһылыга Сергей Винокуров