“Ахта- саныы, сүгүрүйэ” ахтыы дьоро күнэ
“Ахта- саныы, сүгүрүйэ” ахтыы дьоро күнэ Алтынньы 13 күнүгэр оҕону үтүөҕэ-кэрэҕэ угуйар, айылҕаттан бэриллибит талаанын, сатабылын, дьоҕурун сайыннарар аналлаах кииммитин өр сылларга салайан олорбут, улууска убаастанар, дьоҥҥо-сэргэҕэ эйэҕэс, үрдүк култууралаах салайааччы Людмила Егоровна Лукина төрөөбүтэ 80 сылыгар анаан “Ахта- саныы, сүгүрүйэ” ахтыы дьоро күнэ олус истиҥник ыытылынна. Кэлбит ыалдьыттар, үөлээннээхтэрэ, Л.Е. Лукина үөрэнээччилэрэ, эбии үөрэхтээһин киинин ветераннара, аймахтар, киин педагогтара бу үбүлүөйдээх күҥҥэ үтүө киһибитигэр сүгүрүйэн туран, сибэкки дьөрбөтүн мемориальнай дуоскатыгар ууруутугар кытыннылар. Ол кэнниттэн киин иһинэн экскурсияҕа кабинеттарынан сылдьан, эбии үөрэхтээһин киинин үлэтин кытта билистилэр. Салгыы тэрээһин үөрүүлээх чааһыгар Людмила Егоровна үбүлүөйүгэр ананан тахсыбыт видеосюжеты, “Ахта- саныы, сүгүрүйэ” открытка сүрэхтэниитин сэҥээрдилэр. Людмила Егоровна кыыһа Светлана Спиридоновна Михайлова, аймахтара, дьүөгэлэрэ, директордаан олорбут сылларыгар арыллыбыт куруһуоктар, студиялар салайааччылара, салайа сылдьыбыт кылааһын коллектива, үлэлээн кэлбит бэтэрээннэр истиц-иһирэх тылларынан ахтыһан бу күнү ситэрдилэр. Бу күҥҥэ Горнай улууһун депутаттарын сэбиэтин бэрэссэдээтэлэ Константинова М.Г., киин директора Коврова И.К., профком председателэ Тарасова М.А. СӨ үөрэҕириитин туйгунугар, үлэ бэтэрээнигэр, 1976-2002 сс. Эбии үөрэхтээһин киинигэр педагогунан, үөрэх-иитии чааһыгар дириэктэри солбуйааччыга Баишева Антонина Трофимовнаҕа75 сааһын туолбут үбүлүөйүнэн, СӨ үөрэҕириитин туйгунугар, Горнай улууһун сайдыытыгар кылаатын иһин бэлиэ хаһаайкатыгар Татаринова Лукерья Ивановнаҕа 65 сааһынан уонна кэлбит ветераннарга бука барыларыгар өйдөбүнньүк бэлэхтэри туттардылар. Бу тэрээһин чэрчитинэн Людмила Егоровна төрөппүт оҕолоро, ийэлэрэ 80 сыллаах үбүлүөйүн көрсө, кини аатын сүгэр Эбии үөрэхтээһиммит киинин күрүөтүгэр рябина мастары, өр сылларга үүнэр сибэккилэри олортулар, ону таһынан сылын аайы үлэтигэр үрдүк көрдөрүүлээх педагогка “Идэтигэр бэриниилэрин иһин” анал бириэмийэ анаатылар. Саамай долгутуулаах түгэнинэн бу бэлиэни 2006 – 2014 сылларга эдэр техниктэр станцияларын салайааччытыгар, 2014 -2022 сылларга Л.Е. Лукина аатынан эбии үөрэхтээһин киинигэр директорынан үлэлээбит ытыктыыр киһибитигэр Александра Михайловна Колесоваҕа туттардылар. Үөрүүлээх тэрээһин уопсай хаартыскаҕа түһүүннэн түмүктэннэ. Ытыктыыр салайааччыбыт, күндү киьибит үтүө аата үйэлэргэ ааттана турдун, сырдыгы ырааҕы кэрэһэлээбитэ ыччаттарга тарҕаннын.