🤳Фоторепортаж: Билии күнүгэр ыалдьыттаатыбыт — 1 сентября 2026 г. в 23:13:02.268
🤳Фоторепортаж: Билии күнүгэр ыалдьыттаатыбыт 🔔🏫Бүгүн биһиги редакциябыт ыҥырыы тутан, С.П.Данилов аатынан Бэрдьигэстээх оскуолатыгар Билии күнүгэр ыалдьыттаата. Үөрэх бастакы күнүнэн оҕолору эҕэрдэлээн, халлааммыт кытта тупсан, буруонан сабарданан турбут күммүт тахсан, чуумпуран турбут оскуола оҕо чуор куолаһынан чугдааран, билии дойдутун киэҥ эйгэтигэр саҥа аартыктары арыйда. 👩🏫👨🏫Билии күнэ хас биирдии киһиэхэ олус күндү уонна кэтэһиилээх бырааһынньык. Оскуола кэмнэрэ, үөрэппит учууталларбыт биһиэхэ ураты суолу хааллараллар. Оскуолабыт, учууталларбыт үөрэх - билии киэҥ аартыгын арыйан, олохпут оҥкулун оҥосторго сыаналаммат өҥөлөөхтөр. Миэхэ эмиэ, бу күн оскуолаҕа үөрэммит сылларбын саныыр, доҕотторбун, учууталларбын махталынан ахтар ураты күн. 💐💐Онуоха, бырааһынньык үөрүүлээх линейкатыгар биһигини үөрэппит билигин бочуоттаах сынньалаҥҥа олорор бэтэрээн учууталлар кэлбиттэрэ өссө долгутта, уйадытта...Түгэнинэн туһанан, үөрэппит учууталларбар Дора Никитична Алексееваҕа, Александра Саввична Борисоваҕа, Любовь Николаевна Андрееваҕа дириҥник махтанан туран, кырдьыыны билиммэххэ, чэгиэн-чэбдик сылдьалларыгар баҕарабын. ✨✨Быйылгы үөрэх дьылыгар Семен Данилов аатынан оскуолаҕа 67 оҕо оскуола боруогун бастакытын атыллаан киирдилэр. Үөрэхтэрин бүтэрэн, 3 саҥа учуутал ананан, педагогическай үлэлэрин саҕалаатылар. Ону тэҥэ, оскуола коллектива "Спорт-норма жизни" национальнай бырайыак иитинэн ГТО былаһааккатын үлэҕэ киллэрэн, үөрэххэ эрэ буолбакка, оҕо доруобуйатыгар эмиэ болҕомто ууралларын бэлиэтиир наада. Ону таһынан, педагогическай коллектив улахан ситиһиитинэн, алын кылаас учуутала Инга Константинова РФ бастыҥ учууталларын кэккэтигэр киирэн, анал бириэмийэ ылбытын киэн тутта ааттаатылар. 👏👏Үөрүүлээх линейканы оскуола үөрэнээччилэрэ, учууталлара РФ "Сомоҕолоһуу сылыгар" анаан, истиҥ эҕэрдэ нүөмэрдэри көрдөрдүлэр. Ыҥырыылаах ыалдьыттар Улуус баһылыга Никита Андреев, улуустааҕы үөрэх управлениетыттан Ия Заровняева, бэтэрээн учууталлар оҕолорго истиҥ баҕа санааларын тириэртилэр. Үөрэх дьыла саҕаламмытын бэлиэтээн алтан чуораан чугдаарда! Бу курдук, дьиэ кэргэн, оскуола, общественность - биир үс муннук буолан, бииргэ үлэлээн, оҕолорбут үөрэх, билии ылар эйгэлэрэ салгыы сайдан, тупсан иһэригэр баҕарабыт. ✍️Күннэй Алексеева "Үлэ күүһэ" сонуннара