Төрөөбүт тылы үөрэтии - сүрүн сорукпут
Төрөөбүт тылы үөрэтии - сүрүн сорукпут 📖Алтынньы 28 күнүгэр Горнай улууһун Сэмэн Данилов аатынан Бэрдьигэстээх орто оскуолатыгар «Төрөөбүт тылы үөрэтии — сүрүн сорукпут» диэн алын кылаас учууталларыгар аналлаах сэминээр ситиһиилээхтик буолан ааста. 🔍Тэрээһин туһунан сырдатыы: Сэминээр үөрүүлээх быһыыга-майгыга аһыллан, учууталлар биир тыынынан мустан, төрөөбүт тылбыт кэскилин туһугар долгуйуулаах кэпсэтиини саҕалаатылар. Бастакы чааска учууталлар бэйэлэрин айар бөлөхтөрүн уопутун үллэһиннилэр: - «Төрөөбүт тылбыт билиҥҥи туруга», «Саха тылын уруогар аналлаах дидактическай матырыйааллар», Сидорова У.Н. - «Саха тылыгар аналлаах олимпиада сорудахтара», Леонтьева В.И. - «Маҥнайгы кылааска устууга аналлаах эрчиллэр-тэтэрээт», Антонова Л.А. - «Доҕотторбут - буукубалар». Маҥнайгы кылааска аналлаах дидактическай босуобуйа, Пахомова М.И. - «Мындыр өй» остуол оонньуута, Александрова О.С. Сэминээр иккис сүрүн чааһынан «Тобуллаҕас толкуй» оонньуу-күрэс буолла. Манна кыттааччылар бөлөҕүнэн арахсан, түргэн-тарҕан толкуйдарын, билиилэрин тургуттулар. Күрэс тыҥааһыннаахтык ааста, учууталлар бэйэлэригэр саҥа идиэйэлэри сомсон ыллылар. 📌Түмүк: Тэрээһин кыттааччылар санааларын көтөҕөн, инники үлэҕэ кынаттаата. Сэминээр кэнниттэн учууталлар санаа атастаһыытын кэмигэр, маннык көрсүһүүлэр улахан суолталаахтарын, уопут атастаһыыта идэ таһымын үрдэтэрин бэлиэтээтилэр. Күрэс түмүгүнэн кыайыылаахтар ааттара билиннэ, кинилэргэ Мэҥэ сурук уонна өйдөбүнньүк бэлэхтэр туттарылыннылар. Бары кыттааччыларга туоһу суруктар бэрилиннилэр. Төрөөбүт тылбыт сайдарын туһугар өссө да иннибит диэки!