НО

Новости образования Верхневилюйского улуса

Госорганы и учреждения · 17 октября 2026 г.

Открыть канал в MAX

🍁Cаха сиригэр Ийэ күнүн уонна Аҕам саастаахтар күннэрин чэрчитинэн улуус администрация...

🍁Cаха сиригэр Ийэ күнүн уонна Аҕам саастаахтар күннэрин чэрчитинэн улуус администрациятын, улуустааҕы үөрэх салалтатын, улуус дьахталларын Сэбиэтин, оҕолорун тэрээһининэн «Ийэкээм сыдьаайар сырдыга» диэн Герой Ийэ, Саха АССР оскуолаларын үтүөлээх учуутала, Үөһээ Бүлүү улууһун Бочуоттаах олохтооҕо, "Ийэҕэ муҥура суох махтал" анал бэлиэ хаһаайына, Саха АССР Верховнай Сэбиэтин икки төгүллээх депутата, учуутал, уопсастыбаннай диэйэтэл, салайааччы Ксения Илларионовна Жиркова 100 сааһыгар аналлаах улуустааҕы О. Д. Фёдорова аатынан кииннэммит библиотекаҕа Ийэ олоххо аналын тула истиҥ сэһэргэһии дьоро күнэ буолла. Тэрээһин сүрүн сыала Ксения Илларионовна дьоһун олоҕун эдэр көлүөнэ ыччакка, эдэр ыалга, ийэлэргэ билиһиннэрии. Тэрээһиҥҥэ Бүлүү куоратыттан Ксения Илларионовна сиэнэ, куорат мэра Ян Попов, 97-с сааһыгар сылдьар, СР үөрэҕириитин үтүөлээх үлэһитэ Ульяна Терентьевна Тимофеева, Герой ийэлэр, бөһүөлэк активист ийэлэрэ, общественнай тэрилтэлэр коллективтара, эдэр учууталлар, Ксения Илларионовна оҕолоро, аймахтара, чугас дьоно кыттыыны ыллылар. Тэрээһини библиотека специалиһа Дария Павлова салайан ыытта. Д. С. Спиридонов аатынан Үөһээ Бүлүүтээҕи Улуустааҕы гимназия педагога Раиса Дмитриевна дьонун олохторун, дьоллоох оҕо саастарын, үөрэх билии үрдүк кыһатыгар, үлэҕэ, олоххо уһуйуллуу үрдүк эппиэтинэһин чиҥник иҥэрбит ытыктыыр төрөппүттэрин туһунан истиҥ ахтыыны оҥордо. Сиэн уол Ян Попов эһэлээх эбэтин олохторо кинилэр эдэр көлүөнэ ыччаттарыгар, сиэннэригэр үтүө холобур буолан салҕанарын, кинилэргэ өрүү истиҥ махталлаахтарын эттэ. Кини Герой ийэлэргэ, тэрийээччилэргэ махталын бэлиэтин сибэкки дьөрбөтүн туттарда. Улуустааҕы үөрэх салалтатын начальнига Леонид Николаевич Огочонов тэрээһин кыттыылаахтарын буолаары турар Саха сиригэр Ийэ күнүнэн, ааспыт аҕам саастаахтар күннэринэн эҕэрдэлээтэ уонна улуустааҕы үөрэх салалтата үлэлээн ааспыт, үөрэхтээһиҥҥэ история кэрэһиттэрэ буолар бэтэрээннэригэр болҕомто уурулларын, кинилэр үлэлэрэ, олохторо эдэр көлүөнэни иитиигэ үтүө холобур буоларын, умнуллубатын, үөрэтиллэрин эттэ. Бүгүҥҥү тэрээһин, улууспут биир бастыҥ дьиэ кэргэнин педагогическай династиятын төрүччүлэрин, чуолаан, Герой Ийэ Ксения Илларионовна күн күбэй Ийэ, тапталлаах Эбээ, учуутал, салайааччы, общественница быһыытынан олус эппиэттээх үлэтин, толору дьоллоох - соргулаах олоҕун эдэр көлүөнэ ыччакка холобур быһыытынан чугастык билиһиннэриигэ, чулуу дьоммутунан киэн туттуу тыыныгар иитиигэ улахан оруоллааҕын бэлиэтээтэ. Спиридоновтар дьиэ кэргэн оҕолоро бары үрдүк үөрэхтэнэн, үлэһит буолан, төрөппүттэрин үтүө ааттарын ааттата сылдьалларынан киэн туттарын, кинилэр дьонноругар махталларын бэлиэтин "Свет немеркнущий" диэн төрөппүттэрин олохторун, үлэлэрин көрдөрөр, дьиэ кэргэҥҥэ оҕону иитиигэ улахан холобур буолар кинигэни таһаарбыттарын дириҥ махталынан бэлиэтээтэ. Салгыы улуустааҕы ыччат уонна дьиэ кэргэн политикатыгар отделын салайааччыта З. М. Колосова, СР үөрэҕириитин үтүөлээх үлэһитэ У. Т. Тимофеева, СР "Матери России" общественнай түмсүү Үөһээ Бүлүүгэ салайааччыта Л.Т. Долгунова, улуус дьахталларын сэбиэтин президиумун чилиэнэ К. В. Борисова, оҕолоро, Үөһээ Бүлүүтээҕи И. Н. Барахов аатынан 1№-х орто оскуола бэтэрээн учууталлара, Ксения Илларионовна үөрэнээччилэрэ Саха сиригэр Ийэ күнүнэн эҕэрдэ тылларын этэн туран, улууспут киэн туттар педагогическай дьиэ кэргэнин Дмитрий Спиридонович, Ксения Илларионовна өр сыллаах үлэлэрэ, дьиэ кэргэҥҥэ холобур буолар олохторо өссө да үөрэтиллэн, кэҥэтиллэн Өрөспүүбүлүкэ, улуус үүнэр көлүөнэтин иитиигэ үйэлэргэ хаалар үтүө холобур буолуо диэн тэрээһин кыттыылаахтара биир санааҕа кэллибит. Улуустааҕы үөрэх салалтата Улуустааҕы дьиэ кэргэн киинэ Дьахталлар Сэбиэттэрэ Спиридоновтар педдинастиялара