Үөһээ Бүлүү улууһун үөрэҕин салалтатын, педагогическай общественноһын аатыттан, улууска...
Үөһээ Бүлүү улууһун үөрэҕин салалтатын, педагогическай общественноһын аатыттан, улууска, Өрөспүүбүлүкэҕэ киэҥник биллэр үлэлээх, киэҥ далааһыннаах общественник, советскай –партийнай, комсомольскай салайааччы, РФ Компартиятын Үөһээ Бүлүүтээҕи кэмитиэтин сэкиритээрэ, СР норуотун хаһаайыстыбатын үтүөлээх үлэһитэ, «Партийнай килбиэн» анал бэлиэ хаһаайына, «Үөһээ Бүлүү улууһа» МО, Мэйик, Үөһээ Бүлүү нэһилиэктэрин МТ Бочуоттаах олохтооҕо, СР Бочуоттаах бэтэрээнэ, дойдутун, улууһун, төрөөбүт Мэйигин, Үөһээ Бүлүүтүн нэһилиэгин патриота, улахан дьиэ кэргэн тапталлаах аҕата, эһэтэ, Степанов Георгий Алексеевич 73 сааһыгар үлэ үөһүгэр сылдьан, алтынньы ый 27 күнүгэр хомолтолоохтук олохтон туораабытынан, дириҥ кутурҕаммытын тиэрдэбит. Степанов Г.А. 1953 сыллаахха муус устар ый 25 күнүгэр Үөһээ Бүлүү оройуонун Мэйик нэһилиэгэр күн сирин көрбүтэ. 1970 сыллаахха Далыр орто оскуолатын бүтэрэн олох киэҥ аартыгар бигэтик үктэммитэ, бу кэмтэн кини улахан дьоһуннаах олоҕо саҕаламмыта. 1979 сыллаахха Саха госуниверситетын, 1983 сыллаахха Хабаровскайдааҕы үрдүкү партийнай оскуоланы үөрэнэн бүтэрбитэ. Томпо оройуонугар уһуннук үлэлээн, салайар үлэҕэ баай уопуту ылан, 1991 сыллаахха дойдутугар Үөһээ Бүлүүгэ төннөн кэлэн, төрөөбүт дойдутун норуотун хаһаайыстыбата сайдыытыгар олоҕун тиһэх күннэригэр диэри олус бэриниилээхтик үлэлээн орто дойду олоҕуттан барда. Кини ураты үтүө санаалаах, салайааччы быһыытынан үрдүк культуралаах, дьон кыһалҕатын бэйэтин нөҥүө өйдүүр ураты салайааччы этэ. Нэһилиэк олоҕун, үлэтин – хамнаһын, нэһилиэккэ олорон, үлэлээн ааспыт үлэ бэтэрээннэрин туһунан “Үөһээ Бүлүү” хаһыат сыһыарыытыгар тахсар суруйууларын олохтоохтор долгуйа, астына ааҕаллара, саҥа суруйууларын күүтэллэрэ. Улууска үөрэхтээһин сайдыытыгар бэйэтэ ураты көрүүлээх этэ, САПИ «Сайдыы тур» программатынан улуус үгүс ыччата салгыы үөрэнэн идэ ылыытыгар, оскуолаҕа үөрэнэр кэмигэр тас дойдуларга тахсан сынньанарыгар, эбии үөрэнэригэр быһаччы үлэлэспит, тэрийсибит киһинэн буолар уонна үгүс төрөппүт, үөрэнээччи махталын ылбыта. Улуустааҕы үөрэх салалтата, педагогическай общественноһа Георгий Алексеевич дьиэ кэргэнигэр, олоҕун эрэллээх доҕоругар, тапталлаах кэргэнигэр Валентина Николаевнаҕа, оҕолоругар Саргылаана Георгиевнаҕа, Ньургуйаана Георгиевнаҕа, күтүөттэригэр, сиэннэригэр, бары аймахтарыгар, бииргэ үөрэммит оҕо сааһын доҕотторугар, бииргэ үлэлээбит коллегаларыгар, бары билэр дьонугар дириҥ кутурҕаммытын тиэрдэбит. “Үөһээ Бүлүү улууһа” МО үөрэҕин салалтатын начальнига, Леонид Огочонов