Өлүөнэ, Өлөөн, Дьааҥы уонна Индигиир өрүстэргэ муус салгыы устар — 5 июня 2026 г. в 07:04:34.519
Өлүөнэ, Өлөөн, Дьааҥы уонна Индигиир өрүстэргэ муус салгыы устар Саха сирин хоту өттүгэр Өлүөнэ, Өлөөн, Дьааҥы уонна Индигиир өрүстэргэ муус салгыы устар. Анаабыр өрүскэ билигин да муус турара бэлиэтэнэр. Бу туһунан брифиҥҥэ СӨ Гражданскай көмүскэлгэ миниистирин бастакы солбуйааччыта Айаал Вензель иһитиннэрдэ. Өлүөнэ өрүскэ муус кырыыта Булуҥ улууһун Күһүүр сэлиэнньэтин аннынан бэлиэтэнэр. Өрүс төрдүгэр, Хабаров ыстаансыйатын таһыгар, муус хамсыыра көстөр. Өлөөн өрүскэ Түмэти гидропоһун аттыгар муус хойуутук устар. Дьааҥы өрүскэ Усуйаана улууһун Усуйаана бөһүөлэгин аттыгар муус устуута салҕанар. Онно уу таһыма биир миэтэрэттэн ордук түспүт, 51 тиэргэн ууга сытар. Дьиэлэр биир миэтэрэ үрдүктээх сыбаайаларга тураллар. Чокурдаах бөһүөлэк аттыгар Индигиир өрүс эстиитэ орто сыллааҕы көрдөрүүттэн икки суукка эрдэлээбит. Киэҥ Күөл сэлиэнньэтин аттыгар уу таһыма түһэрэ бэлиэтэнэр, ол гынан баран, тоҕус тиэргэн уонна икки олорор дьиэ ууга тураллара биллэр. Халыма өрүс долгуна соторутааҕыта өрүс төрдүгэр тахсыбыт. Ол эрээри Зырянка бөһүөлэккэ аэропорт балаһата ууга сытар. Налимскай бөһүөлэккэ үс олорор дьиэ тиэргэнэ, ону тэҥэ оскуола уонна уһуйаан ууга бардылар. Нам улууһун Арбын нэһилиэгин Сыгыннаах сэлиэнньэтин таһыгар Алдан өрүскэ халаан иккис долгунуттан уу таһыма үрдээбит, биэс тиэргэн ууга турар. Исписэлиистэр өрөспүүбүлүкэ хотугу өрүстэригэр гидрологическай балаһыанньаны суукканы эргиччи кэтээн көрөллөр. Хаартыска: sakha.gov.ru