Саха сирин уһуйааннарыгар 62 тыһыынчаттан тахса оҕо иитиллэр — 2 июня 2026 г. в 08:40:00.825
Саха сирин уһуйааннарыгар 62 тыһыынчаттан тахса оҕо иитиллэр Өрөспүүбүлүкэҕэ оскуола иннинээҕи үөрэх систиэмэтэ салгыы сайдар. Бүгүҥҥү күҥҥэ региоҥҥа 700-тэн тахса үөрэх тэрилтэтэ оскуола иннинээҕи үөрэх бырагыраамаларын олоххо киллэрэр, онно 62 тыһыынчаттан тахса оҕо, ол иһигэр үс саастарыгар диэри 13 тыһыынчаттан тахса кырачаан иитиллэр. Оскуола иннинээҕи тэрилтэлэр ситимнэрин сайыннарыы Россия бэрэсидьиэнэ Владимир Путин көҕүлээбит «Молодёжь и дети» уонна «Семья» национальнай бырайыактарын, ону тэҥэ «Биир Ньыгыл Россия» баартыйа «Здоровое будущее» бырайыагын сыалларыгар уонна соруктарыгар сөп түбэһэр. «Биир кэлим үөрэх систиэмэтин соруга – эдэр гражданины идэтийбит үлэҕэ бэлэмнээһин, дьиэ кэргэн уонна уопсастыба туһугар ситиһиигэ дьулуурдаах, күүстээх санаалаах киһини иитии. Биһиги сиэр-майгы өттүнэн эбээһинэспит – төрөөбүт дойдуга тапталы уонна бэриниилээх буолууну иҥэрэн, оҕолору сөптөөх сыаннастарга иитии», — диэн Ил Түмэҥҥэ туһаайыытыгар Ил Дархан, «Биир Ньыгыл Россия» баартыйа регионнааҕы салаатын сэкирэтээрэ Айсен Николаев бэлиэтээбитэ. Дьокуускай куорат 2030 сылга диэри маастар-былаанын чэрчитинэн 14 саҥа уһуйаан тутуута былааннанар. Оскуола иннинээҕи тэрилтэлэр «Звезднай» дьоҕус түөлбэҕэ, «Новопортовской» кыбаарталга, Киин уонна Сайсаар уокуруктарга, 55 уонна 55а кыбаарталларга, 68 кыбаарталга, Бүлүүлүүр суолга, Хатас сэлиэнньэтигэр, Новокарьернай уулуссаҕа, ону тэҥэ куорат Бырамыысалыннай уокуругар баар буолуохтара. Сорох эбийиэктэр бырайыагы оҥорооһун уонна бырайыак сметатын докумуоннарын бэлэмнээһин түһүмэҕэр сылдьаллар. «Дьиэ таһыгар аныгы уһуйаан баар буоллаҕына, бу төрөппүттэргэ олус суолталаах. Биһиги оҕо табыгастаах уонна куттала суох усулуобуйаҕа сылдьарыгар, хаачыстыбалаахтык сайдарыгар уонна биир саастыылаахтарын кытта алтыһарыгар эрэнэбит. Саҥа уһуйааннар баар буоланнар, элбэх дьиэ кэргэн үлэтигэр түргэнник төннөр уонна инникини былаанныыр кыахтанна», — диэн киин куорат олохтооҕо, икки оҕолоох ийэ Саргылана Егорова санаатын үллэһиннэ. Хаартыска: sakha.gov.ru #Якутия2026