Мэҥэ Хаҥалас далбар хотуттара “Илиилэрин сылааһа” байыастарга быыстала суох тиийэр — 19 июня 2026 г. в 02:08:13.778
Мэҥэ Хаҥалас далбар хотуттара “Илиилэрин сылааһа” байыастарга быыстала суох тиийэр Мэҥэ Хаҥалас улууһугар Төҥүлү бөһүөлэгэр “Илии сылааһа Хотун Төҥүлү” уопсастыбаннай түмсүү кыттыылаахтара анал байыаннай дьайыыга сылдьар байыастарга байыаннай таҥастары тиһигин быспакка тикпиттэрэ үһүс сылыгар барда. Төҥүлү волонтердара инники кирбиигэ сылдьаннар илиилэрин араарбакка күн ахсын иистэнэр сыахха кэлэннэр кыһыннары, сайыннары байыаннай кэмпилиэктэри тигэллэр. Хотун Төҥүлү филиалын иистэнньэҥнэрэ анал байыаннай дьайыыга сылдьар байыастар кэтэр таҥастарын хаачыстыбалаахтык тигэннэр өрөспүүбүлүкэҕэ биир тарбахха баттанар филиал быһыытынан биллэллэр. Ол туоһутунан бу күннэргэ ыытыллыбыт алтыс өрөспүүбүлүкэтээҕи куонкуруска кыттаннар бочуоттаах үһүс миэстэни ылары ситиспиттэр. Бөһүөлэк дьоно-сэргэтэ туора турбакка ким туох кыахтааҕынан күүс-көмө буоларын бэлиэтиир тоҕоостоох. Ону сэргэ улуус салалтата, дьокутааттар өйөбүл буолаллар. Түмсүүгэ сылдьар ийэлэр төрөппүт уолаттара СВО-ҕа кытта сылдьалларынан, кинилэр ыраахтан да буоллар, күн ахсын санааларынан, алгыстарынан, илиилэрин сылааһынан тикпит таҥастара, байыастарга харысхал буолара саарбаҕа суох. Бу курдук уустук кэмҥэ бөһүөлэк дьоно бары биир саанаанан түмсэннэр, уопсай дьыалаҕа Кыайыы туһугар күннэтэ күргүөмнээхтик үлэлииллэр.