Сунтаар улууһун 225 сылыгар анаммыт уран оҥоһуктар быыстапкалара аһылынна — 19 июня 2026 г. в 01:43:25.172
Сунтаар улууһун 225 сылыгар анаммыт уран оҥоһуктар быыстапкалара аһылынна Сунтаар улууһа төрүттэммитэ 225 сыллаах үбүлүөйүн көрсө, бэс ыйын 20-21 күннэригэр ыытыллар үрүҥ тунах ыһыахха анаан, Сибиэрэп түмэлэ улуус олохтоохторугар уонна ыалдьыттарыгар кэрэ бэлэҕи оҥордо. Ол курдук, норуот үүнэр көлүөнэлэргэ хаалларбыт улуу нэһилиэстибэтин тилиннэрэр, саха ууһун уран тарбаҕын сатабылын көрдөрөр киэҥ быыстапканы туруордулар. Манна 11 бастыҥ маастардар айымньылара дьон дьүүлүгэр таҕыстылар. Уран маастардар быыстапкалара иис ууһа Зинаида Понохова илиитинэн тикпит сахалыы мааны симэхтэрин дефилетынан саҕаланна. Дьэрэкээн оҕуруонан, сахалыы оһуорунан-бичигинэн киэргэтиллибит иҥигэстэр, илин-кэлин кэбиһэрдэр, бастыҥалар көрөөччү хараҕын сылаанньыттылар. Быыстапкаҕа кэлбит дьон хараҕын тута тардар экспонатынан Сунтаар улууһун биир киэн туттар тимир ууһа, Николай Потапов - Дабайар Уус оҥоһуктара буоллулар. Кини саха быһаҕынан уонна ат симэҕинэн идэтийэр буоллаҕына, быйыл саха мааны иһитин-хомуоһун арааһын ураннаан таһаарбыт. Чорооннору, кытыйалары, күннээҕи туттуллар иһиттэри уратытык чочуйан, сахалыы ойуунан-бичигинэн киэргэтэн, өбүгэбит тутта сылдьыбыт малын-салын бүгүҥҥү олоххо тилиннэрбит. Быыстапка өссө биир дириҥ ис хоһоонноох, ураты хайысхатынан «Сыахай» экспозицията буолла. Манна Сунтаар улууһун былыргы аҕа уустарын, нэһилиэктэрин историятын кытта сиһилии билсиэххэ, олорон ааспыт өбүгэлэрбит, улууһу төрүттээбит улуу дьоммут сэбэрэлэрин көрүөххэ сөп. Норуот номоҕор, кэпсээннэргэ уонна былыргы хаартыскаларга олоҕуран, маастардар кинилэр дьүһүннэрин олус итэҕэтиилээхтик, ситэ-хото тилиннэрэн көрдөрбүттэрэ киһини сөхтөрөр. Бу биһиги историябыт кэрэһитэ, кэлэр көлүөнэҕэ хаалар үйэлээх өйдөбүнньүкпүт. Онон, үбүлүөйдээх ыһыах мааны ыалдьыттарын, Сунтаар олохтоохторун түмэлгэ кэлэн, уран маастардар сыралаах үлэлэрин бэйэҕит хараххытынан көрөн сыаналыырга, сэргээн сэҥээрэргэ ыҥырабыт. Бу быыстапка улуус баай историятын, талааннаах дьонун уонна кэнчээри ыччакка хаалларар нэһилиэстибэтин биир кэлимник көрдөрөр кэрэ түһүлгэтинэн буолар диэн Сунтаар улууһун дьаһалтатын пресс-сулууспата иһитиннэрэр.