Алдан өрүскэ сүппүт дьон аһыы утаҕы иһэн баран тыынан айаннаабыттар — 10 июля 2026 г. в 03:41:52.669
Алдан өрүскэ сүппүт дьон аһыы утаҕы иһэн баран тыынан айаннаабыттар Алдан оройуонугар Алдан өрүскэ от ыйын 8 күнүгэр буолбут быһылааҥҥа биэс эр киһилээх хампаанньа тыынан айанныахтарын иннинэ аһыы утаҕы испиттэрэ билиннэ. Бу туһунан СӨ Быыһыыр сулууспата иһитиннэрдэ. Эр дьон мотордаах тыынан Угоянтан Хатастыырга диэри от ыйын 8 күнүгэр 19.00 чааска айаннаан тиийбиттэр. Төттөрү айанныахтарын иннинэ аһыы утах испиттэр, Угоянтан 25 км үөһэ сүүрүгүнэн устан истэхтэринэ тыыларын двигателэ аккаастаабыт. Ол түмүгэр тыылара уунан туолан баран түргэн баҕайытык тимирэн барбыт. Биэс киһи бары суудунаттан өрүскэ тахсан биэрэккэ диэри харбыы сатаабыт. Биир 1992 сыллаах төрүөх эр киһи быыһаммыт. Кини этэринэн, атыттар эмиэ биэрэккэ диэри харбаан иһэллэрин көрбүт уонна өйүн сүтэрбит. Оттон өйдөммүтүгэр аттытыгар ким да суох буолбут. Аара суолга тырааныспары тохтотон Хатыстыырга тиийэн буолбут быһылаан туһунан тыллаабыт. Санатар буоллахха, бээтинсэ сарсыарда СӨ Быыһыыр сулууспатын түөрт водолаһа буолбут быһылаан миэстэтигэр айаннаабыта. Быыһааччылар уу аалынан айан иннинэ эбэтэр айанныы сылдьан аһыы утаҕы иһэри тохтоторго ыҥыраллар. Кыратык даҕаны испит киһи ууга тахсыбыт балаһыанньаны сөпкө сыаналаабат буолар. Өскөтүн ууга тыы мотора алдьанар эбэтэр тыы тимирэр түгэнигэр итирик туруктаах киһи кыайан биэрэккэ диэри харбаан быыһаммат. Хаартыска: СӨ Быыһыыр сулууспата