Ээйик сэлиэнньэтин таһынааҕы ойуур баһаарын 89 киһи умуруорар — 26 июля 2026 г. в 07:28:52.307
Ээйик сэлиэнньэтин таһынааҕы ойуур баһаарын 89 киһи умуруорар Өлөөн улууһун Ээйик сэлиэнньэтин таһыгар турбут ойуур баһаарын умуруоруу үлэтэ салҕанар. Уустук быһыы-майгы үөскээтэр да, нэһилиэнньэлээх пууҥҥа быһаччы куттал суох. Баһаары умуруорууга 89 киһи уонна 12 анал тиэхиньикэ кыттар. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Андрей Коноплев иһитиннэрдэ. «Баһаар кытыыта нэһилиэнньэлээх пуунтан 4,5 килэмиэтирдээх сиргэ баар. Уот хотуттан соҕуруу диэки тарҕанар. Нэһилиэнньэлээх пуун олохтоохторугар уонна инфраструктураҕа быһаччы куттал суох», — диэн кини эттэ. Нэһилиэнньэлээх пууну көмүскүүр сыалтан хаххалыыр (заградительнай) лиинийэлэри оҥорууга көхтөөх үлэ ыытыллар. Ойуур-баһаарынай этэрээттэр күүстэринэн уонна олохтоох дьон көмөтүнэн бөһүөлэги уот салгыы тарҕаныытыттан араарар туһугар, ойуур диэкиттэн эргимтэ аҥаара гына илиинэн минерализованнай балаһа хаһыллар. Салгыы былаан быһыытынан хонтуруолланар өртөөһүн ыытыллыаҕа. «Маны таһынан, уоту тохтоторго көмөлөһөр айылҕа мэһэйдэринэн сэлиэнньэ соҕуруу уонна хотугулуу-илин өттүгэр баар күөллэр буолаллар», — диэн Коноплев бэлиэтээтэ. Бүгүҥҥү күн туругунан алта килэмиэтир кэриҥэ минерализованнай балаһа хаһыллан оҥоһуллубут. Бүгүн оҥоһуллубут лиинийэнэн батыһа хонтуруолланар өртөөһүн ыытыллыаҕа. Ону тэҥэ, сэлиэнньэ хотугулуу-арҕаа уонна соҕуруулуу-арҕаа өттүгэр баар күөллэр икки ардыларыгар минерализованнай балаһалары оҥоруу үлэтэ салҕаныаҕа.