Бүгүн, балаҕан ыйын 4 күнүгэр Мэҥэ Хаҥалас улууһугар үлэбин салгыыбын. — 4 сентября 2026 г. в 10:50:13.170
Бүгүн, балаҕан ыйын 4 күнүгэр Мэҥэ Хаҥалас улууһугар үлэбин салгыыбын. Сарсыардаттан Харатааҕы орто оскуола саалатыгар дьон бөҕө тоҕуоруһа мустубутун көрөн үөрдүм. Илэ көрсөн кэпсэтэн, дойдуга буола турар араас боппуруостарга санаа атастаһан, олус көхтөөх кэпсэтии буолла. Олохтоохтор бэйэ оҥорон таһаарар этин-арыытын сыанатын сөпкө быһыы, Аҕа дойду улуу сэриитин кыттыылаахтарын үйэтитии үлэтин утумнаахтык салҕааһын, инбэлииттэргэ сыһыаннаах араас боппуруостары туруорсаллар. Биирдиилээн сирэй көрсөн кэпсэтиигэ СВО-ҕа суох буолбут дьон докумуонун, наҕараадатын ситиһии, умайбыт дьиэлээх ыал бырааптарын туруорсуу курдук боппуруостарга көмөлөһөргө суруннум. “Түмэн” түмсүү тутаах дьонун кытта эбиэт кэмигэр ирэ-хоро кэпсэтэн аастыбыт, баар кыһалҕаларга тохтоон, санааларын аһаҕастык этэн, инники былааннары торумнаан, олус дириҥ ис хоһоонноох кэпсэтии буолла. Маннык көрсүһүүлэргэ аҕа саастаах дьон ыллыктаах санаата, күүстээх эрэлэ биһигини кынаттыыр. Ороссолуода нэһилиэгэр көрсүһүүгэ ордук ыччат тыа сиригэр олохсуйар усулуобуйатын тэрийии, үөрэх тэрилтэлэрин үлэһиттэригэр Уһук Илиҥҥи ипотека бырагырааманан кирэдьиит, саҥа кулууп дьиэтин тутуу боппуруостарын олохтоохтор туруорсаллар. Холобур, учууталга аналлаах кирэдьиити эдэр учуутал сатаан туһанар кыаҕа суох буолар түгэнигэр анал идэлээх дьон быһааран, сүбэлээн биэрэллэрэ ирдэнэр. Ону таһынан граҥҥа (грант) үлэлэһиигэ эмиэ тустаах үлэһиттэри кытта ыкса үлэлэһии, ситиһии төрдө буолара эмиэ саарбаҕа суох. Бу боппуруостарга болҕомтону уурар тоҕоостоох диэн бэлиэтэнним. Хас көрсүһүү аайы биир дойдулаахтарым сайдыыны-кэскили тутуһар истиҥ баҕалара, ханнык да кыһалҕаттан иҥнибэккэ, бэйэ күүһүгэр эрэнэн үчүгэйи эрэ үксэтэр санаалара олус үөрдэр, күүспүтүгэр күүс эбэр. Мантан киэһээ түөлбэлэри кытта көрсүһүүлэр...