Күндэйэтээҕи «Сырдык Аартык» тыа хаһаайыстыбатын кээпирэтиибин ситиһиитэ
Күндэйэтээҕи «Сырдык Аартык» тыа хаһаайыстыбатын кээпирэтиибин ситиһиитэ Москва куоракка ыытыллыбыт күһүҥҥү дьаарбаҥка түмүгүнэн, Күндэйэ нэһилиэгин «Сырдык Аартык» тыа хаһаайыстыбатын потребительскай кээпирэтиибэ үрдүк наҕараадаҕа - кыһыл көмүс бэлиэҕэ тигистэ. Бу ситиһии олохтоох хаһаайыстыба таһаарар бородууксуйатын хаачыстыбата федеральнай таһымҥа үрдүктүк сыаналаммытын туоһулуур. «Сырдык Аартык» кээпирэтиип тыа хаһаайыстыбатын эйгэтигэр үлэлээбитэ 15 сыл буолла. Бу кэм тухары хаһаайыстыбаҕа үлэни куолаан тэрийии уонна былааннаахтык сайыннарыы түмүгэр күүстээх материальнай-техническай база тэрилиннэ. Бүгүҥҥү күҥҥэ кооператив балансатыгар 3 хотон, үрүҥ аһы уонна эт кэнсиэрбэтин астыыр-үөллүүр анал сыах, ону тэҥэ 6 сайылык баар. Тыа сиригэр үлэһиттэр олорор усулуобуйаларын тупсарар сыаллаах анал бырайыагынан 16 олорор дьиэ тутуллан үлэҕэ киллэриллибитэ. Быйыл судаарыстыбаннай өйөбүл көмөтүнэн саҥа астыыр-үөллүүр сыах үлэҕэ киирдэ. Маны таһынан, сүөһү төбөтүн ахсаанын элбэтэр уонна иитэр усулуобуйаны тупсарар сыалтан 100 төбөҕө аналлаах саҥа хотон тутулунна. Араас хааччах уонна уларыйыы кэмнэригэр бэйэ оҥорон таһаарар үрдүк хаачыстыбалаах, тотоойу ас-үөл ураты суолталанар. Олохтоох бородууксуйа нэһилиэнньэ доруобуйатын туругун тупсарарга эрэ буолбакка, регион ас-үөл өттүнэн куттала суох буолуутун хааччыйар тирэҕинэн буолар. Сунтаар улууһун дьаһалтатын пресс-сулууспата