Дойдуга 10–11 кылаастарга үөрэх таһынан дьарык муҥутуур кээмэйэ кыччаата
Дойдуга 10–11 кылаастарга үөрэх таһынан дьарык муҥутуур кээмэйэ кыччаата 10–11 кылаастар үөрэнээччилэригэр үөрэх таһынан дьарык муҥутуур кээмэйэ икки сыл үөрэнэргэ 700 чаастан 680 чааска диэри кыччаата. Бу туһунан орто уопсай үөрэхтээһин федеральнай бырагырааматын саҥардыы бырайыагар этиллэр диэн ТАСС иһитиннэрэр. Докумуонунан, үөрэх таһынан дьарык былаана үөрэнээччи орто уопсай үөрэҕи ыларыгар дьарык хайысхаларын састаабын уонна тутулун, тэрийии көрүҥнэрин уонна кээмэйин быһаарар. Былааны тэрилтэ бэйэтэ оҥорон таһаарар. Үөрэх таһынан дьарык киһи быһыытынан сайдарга тэриллэр: спортивнай-чэбдигирдэр, духуобунай-нравственнай, социальнай, уопсай интеллектуальнай уонна уопсай култуурунай. Көрүҥнэрэ араас буолуон сөп: уус-уран, культурология, филология, хор устуудьуйалара, ситимнээх уопсастыбалар, оскуолатааҕы спорт кулууптара уонна сиэксийэлэрэ, кэмпириэнсийэлэр, олимпиадалар, байыаннай-патриотическай холбоһуктар, экскурсиялар, күрэхтэһиилэр, көрдүүр уонна билим чинчийиилэрэ уо.д.а. Кыттыы үөрэнээччилэр талыыларынан сөп түбэһиннэрэн, баҕа өттүнэн оҥоһуллар. Бу иннинэ үлэлээбит стандарт 700 чаас муҥутуур кээмэйи көрөр этэ. Орто уопсай үөрэхтээһин саҥа ФГОС-а (федеральнай судаарыстыбаннай үөрэх стандарта) 2027 сыл балаҕан ыйын 1 күнүттэн күүһүгэр киирэр. Хаартыска: Мария Архипова/«Якутия 24»