🤩👏Ил Дархан Амма улууһугар Дьоруой Ийэни кытта көрүстэ
🤩👏Ил Дархан Амма улууһугар Дьоруой Ийэни кытта көрүстэ Саха сирин Ил Дархана Айсен Николаев Амма улууһун Эмис сэлиэнньэтигэр Устиновтар дьиэ кэргэҥҥэ ыалдьыттаата. Ыал ийэтигэр Туйара Устиноваҕа РФ бэрэсидьиэнин ыйааҕынан Дьоруой Ийэ үрдүк аат иҥэриллибитэ. Кини Саха сиригэр үрдүк аакка тиксибит иккис ийэ буолар. Айсен Сергеевич Туйара Петровнаны уонна кини ийэтэ Татьяна Никифоровнаны кытта көрүстэ. Үс көлүөнэ күн күбэй ийэлэр Дьоруой Ийэ үрдүк аакка тиксибиттэр – Туйара Петровна бэйэтэ уонна кини эбэтэ, ийэтэ. Туйара Петровна эбэтэ уонна ийэтэ уон биирдии иитэн улаатыннарбыттар, сэбиэскэй кэмҥэ кинилэргэ Дьоруой Ийэ аат иҥэриллибит. Туйара Петровна тоҕус оҕолоох, түөрт сиэннээх. 30-тан тахса сыл уһуйааҥҥа үлэлээбит. «Туйара Петровнаҕа чэгиэн туругу, кытаанах доруобуйаны, уһун дьоллоох олоҕу баҕарабын! Оҕолорун, сиэннэрин харыстыы араҥаччылыы сырытыннар», – диэн Ил Дархан Айсен Николаев эттэ.