🪖🏹Тааттаҕа СВО кыттыылааҕа Анатолий Данилов аатынан буулдьанан ытыыга күрэх ыытылынна
🪖🏹Тааттаҕа СВО кыттыылааҕа Анатолий Данилов аатынан буулдьанан ытыыга күрэх ыытылынна Алтынньы 24 күнүгэр Таатта улууһун Ытык Күөлүгэр анал байыаннай дьайыы бэтэрээнэ, РФ Сэбилэниилээх Күүстэрин офицера, 394 нүөмэрдээх мотострелковай батальон маҥнайгы ротатын хамандыыра, Хорсунун иһин уордьан кавалера, Таатта улууһун олохтооҕо Анатолий Данилов аатынан буулдьанан ытыыга маҥнайгы күрэх үрдүк таһымнаахтык буолан ааста. Дьиэ кэргэнин, аймах-билэ дьонун, доҕотторун, үөлээннээхтэрин, бойобуой доҕотторун, улуус буулдьанан ытыыга федерациятын, спорт кэмитиэтин, оҕо спортивнай оскуолатын көмөтүнэн тэриллибит күрэхтэһиигэ Тааттаттан, Чурапчыттан, Мэҥэ Хаҥаластан, Уус Алдантан, Амматтан, Горнайтан 72 ытыыны сэҥээрэр, үлүһүйэн дьарыктанар киһи кытынна. Уопсай бириис пуондата – 750 тыһ. солк. 6 кэмпилиэк мэтээл оонньонно. Бастакы миэстэҕэ 25 тыһ. солк туттарылынна, иккискэ – 18 тыһ. солк, үһүскэ –13 тыһ. солкуобай. Муҥутуур кыайыылаахха оптикалаах «Тигр» карабины 394-с мотострелковай полка байыастара, «Леший-2» винтовканы «Эксперт Телеком» тэрилтэ уонна Александр Посельскай дьиэ кэргэнэ, 30 тыһыынчалаах сертификаты Таатта тутааччыларын түмсүүтэ туруордулар. Маны тэҥэ элбэх анал бириистэри олохтоотулар. Эр дьоҥҥо муҥутуур кыайыылаах Чурапчы Кытаанаҕыттан 22 саастаах Михаил Аржаков бойобуой доҕоттор туруорбут оптикалаах «Тигры» бэлэх тутта. Дьахталларга муҥутуур кыайыылааҕынан Чурапчы улууһун бэргэн ытааччыта Виктория Ераскумова ааттанна уонна «Эксперт Телеком» тэрилтэ, Александр Посельскай дьиэ кэргэнэ туруорбут «Леший-2» винтовканан наҕараадаланна. Доруобуйаларынан хааччахтаах кыттааччылартан муҥутуур кыайыылааҕынан Уус Алдантан Елизавета Васильева буолла. СВО кыттыылааҕа Алексей Уваров Тааттаттан анал байыаннай дьайыы байыастарын «Таатта Мохсоҕоллоро» түмсүү анал бирииһин тутта. Анатолий Данилов төрөппүттэрэ, дьиэ кэргэнэ, бииргэ төрөөбүттэрэ маҥнайгытын ыытыллар күрэх тэрийсиитигэр кыттыспыт, күүс-көмө буолбут дьоҥҥо махтаннылар, бу күрэх салгыы сайдан иһиэҕэ диэн иһитиннэрдилэр.