Саха сирэ Уһук Илиҥҥэ сир учаастагын ылыыга 10 сыл түмүгүнэн инники күөҥҥэ сылдьар — 2 июня 2026 г. в 09:14:16.848
Саха сирэ Уһук Илиҥҥэ сир учаастагын ылыыга 10 сыл түмүгүнэн инники күөҥҥэ сылдьар Өрөспүүбүлүкэ 25 тыһ. тахса олохтооҕо 10 сыл иһигэр Уһук Илин гектар бырагырааманан сир учаастага ылыммыт. Итинтэн 3 тыһыынчаттан тахса киһи сири бэйэтин аатыгар суруйтарбыт. Бу кэм устата барыта 60 тыһ. кэриҥэ сайабылыанньа киирбит. Онуоха тустаах бырагырааманан ордук Мэҥэ Хаҥалас уонна Хаҥалас оройуоннарыгар туһаммыттар. Манна 4 тыһыынчаттан тахса дуогабарга илии баттаммыт. Ол кэнниттэн Дьокуускай турар. Киин куоракка 2700 кэриҥэ учаастак бэриллибит. РФ бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев бырагыраама дьоҥҥэ-сэргэҕэ көҥүл биэрэр туһуттан оҥоһуллубутун бэлиэтиир. «Кириитиктэр этэллэрин курдук мээнэ бырагыраама буолбатах. Биһиги бу бырагырааманан нэһилиэнньэ ахсаанын элбэтэбит. Ону тэҥэ дьон-сэргэ төрөөбүт дойдутугар сир учаастагын судургутук ыларын туһугар оҥоһуллубут бырагыраама. Элбэх тэрилтэни кэрийбэккэ, үгүс кумааҕыны хомуйбакка босхо сир учаастагын ылыы мин санаабар сөптөөх дьаһал. Ол иһин биһиги бу бырагырааманы салҕыыр тустаахпыт», – диэн Юрий Трутнев бэлиэтээтэ. Бырагыраама көрдөрүүтүнэн Уһук Илин уонна Арктика регионнарыгар Саха сирэ бастакы миэстэлээх. Оттон туһанааччылар учаастакка чааһынай дьиэ тутталлар, хаһаайысттыба тэринэллэр, бултка-алтка итиэннэ туризма аныыллар. Сир учаастагын бырагыраамата РФ бэрэсидьиэнэ Владимир Путин туруорбут сыалларыгар толору эппиэттиир.