🧐📰 "КӨР, БИЛ" рубрика. Бэһис таһаарыы. — 11 июня 2026 г. в 12:27:20.767
🧐📰 "КӨР, БИЛ" рубрика. Бэһис таһаарыы. Сайын саҕаланыыта, бэс ыйын ахсыһыгар, социальнай эйгэ үлэһиттэрин күнэ. Бу күҥҥэ анаан быйыл 30 сылын бэлиэтиир В.А. Петрова аатынан Ньурбатааҕы кырдьаҕастар дьиэлэригэр ыалдьыттаатыбыт - Нюрбинский межулусный дом-интернат для престарелых и инвалидов. 🏣 ДИПИ тэйиччи, ол эрэн олус табыгастаах сиргэ турар. От-мас баар, массыына сырыыта аҕыйах. Ол аата сибиэһэй салгыннаах. Ити курдук киириигэ таһырдьаттан олохтоохтор дорооболоһон көрүстүлэр. Кырдьыга да сибиэһэй салгын. Ааҥҥа салайааччы Данил Валерьевич Иванов солбуйааччыта Мария Константиновна Куличкина көрүстэ. Аттыгар кэпсэтиэхтээх, билсиэхтээх үлэһиппит турар. 💊 Медицинскэй лицензиялаах социальнай тэрилтэ буоларынан, бу хайысха уратытынан даҕаны манна 14 медиктарын соцүлэһит тэҥэ ылыналлар. Онон 2013 сылтан үлэлиир, үрдүк категорияҕа тиийбит физиотерапия старшай сиэстирэтэ Сандра Николаева бүгүҥҥү геройбут. 👍🏼 Кини бу үлэҕэ өссө урукку дьиэ баарыгар киирбит. Тутатына физиотерапияҕа үөрэммит. 2014 с. ДИПИ саҥа дьиэҕэ көһөрүгэр идэтигэр саҥа кэрчик саҕаламмыт. Көрүө этигит, кабинетын хас биирдии тэрилин хайдах курдук кичэллээхтик кэпсиирин. 📝 Сандра Васильевна үлэтэ 09:00 ч. саҕаланар, 17:30 ч. түмүктэнэр, эбиэттээх. Күҥҥэ ортотунан 15 киһи процедура ааһар. Хоһо толору хааччыллыылаах, уонунан аппараттаах. Өрүмүөн кэннэ күһүн туус хоһо баар буолбут. Олус туһалааҕа, адаптация ааһарга үчүгэйэ бэлиэтэнэр. Уонна аттыгар массаж хостоохтор. 🏥 ДИПИ-гэ сүрүннээн Бүлүү бөлөхтөн киирэллэр. Бу дьиэҕэ баар 114 олохтоох тухары доруобуйаҕа араас кыһалҕа. Быраас ананыытынан Сандра Васильевна аппараттарын үлэлэтэр: ис органнарга, ириҥэлээх баастарга, сискэ, сүһүөххэ, ниэрбэҕэ, былчыҥҥа, инсуллаабыттарга, о.д.а. Отой кыамматтарга хосторунан сылдьарга портативнайдар бааллар. 🔌 Кырдьаҕастар тыаһыыр уонна сылытар аппараттары ордороллор эбит, атыттарын эттэрэ билбэтэҕин да иһин, барыта күүстээх, абырыыр тэриллэр. Дарсонваль, биоптрон, УВЧ, УФО, УЗТ аппараттар дьоҕустарын көрүллүбэт. Көдьүүстээх. 🌿 Көрүдүөр аайы олорор сирдэр, истиэнэҕэ араас уруһуйдар элбэхтэр, бииртэн биир кэрэ сибэкки. Араас муннуктары көрдүбүт. Кырдьаҕастар дьиэлэрин бастакы табличката кытары баар. Түннүк аайы оҕуруот аһын, сибэкки рассадата. Ол сылдьан сиэстирэбит дьонунаан кэпсэтэн ааһар. 👩🏻⚕ Сандра Васильевна олус көхтөөх эбит. Кини профсоюз бэрэссэдээтэлин солбуйааччыта, ДИПИ иһинэн "Айуу, чэ" театр түмсүүтүн салайааччыта, "Вдохновение" үҥкүү бөлөҕүн кыттыылааҕа. Төһө да ыарахаттардааҕын иһин үлэтин сөбүлүүрүн этэр. Майгыта, үтүө санаата барсарын иһин 13 сыл социальнай хайысхалаах тэрилтэҕэ үлэлээн кэллэҕэ. 👏🏼 71 үлэһиттиин, 114 олохтоохтуун биир дьиэ кэргэн кэриэтэ иллээх, сэргэх олохтоох Ньурбатааҕы кырдьаҕастар дьиэлэрэ дойду үрдүнэн ыытыллар күрэх өрөспүүбүлүкэтээҕи этабыгар "Стабильность и качество" диэн хайысхаҕа үһүс миэстэни ыланнар бу бырааһынньыгы үрдүк ситиһиилээх көрүстүлэр. Аны ый бүтүүтэ үбүлүөйдэрэ. Ону кытта бу ураты миссиялаах тэрилтэ баарыгар сүдү кылааттаах Варвара Андреевна Петрова быйыл 90 сыла. ☀️ Үөрүүлээх тэрээһиннэргэ бэлэмнэнэн икки этээстээх дьиэ тиэргэнигэр саҥа тутуу ыытыллар. Сайыҥҥы куйааска, сылаас киэһэлэргэ онно олорон арааһы дьарыктаныахтара, истиҥник алтыһыахтара, ыалдьыттары, доҕоттору көрсүөхтэрэ турдаҕа. Күнэ да суох күннэргэ манна күн өрүү тыгар буолуохтаах диэн санаа киирдэ. Истиҥ эйгэлээх дьиэ. Ол эйгэни кимнээх олохтууллар? Соцүлэһиттэр. ✍🏻 Айталина Камилова @gazetanyurba @ulusmedia