Билии күнүгэр Антоновка оскуолатын үтүө үгэстэрэ — 1 сентября 2026 г. в 08:46:15.973
Билии күнүгэр Антоновка оскуолатын үтүө үгэстэрэ 🍁 Хас биирдии оскуолаҕа курдук Советскай Союз Геройа Н.Н. Чусовской аатынан Антоновка орто оскуолата үөрэх дьылын саҕалыыр күҥҥэ чуораан тыаһатарга, бастакы кылаастар хоһоон ааҕалларыгар эбии бэйэтэ туспа үгэстэрдээх. 🍁 Эҕэрдэлии, тыл этэ кэлбит ыалдьыттарга оҕолор сыллата оскуолаҕа үүннэриллибит сибэкки туттараллар. Бүгүҥҥү ыалдьыттар Октябрьскай нэһилиэк баһылыга Семен Корякин, улуус баһылыгын солбуйааччыта Наталия Петрова, үөрэх управлениетын салайааччыта Федор Ушканов. 🍁 Саҥа учууталлар кэлэр түгэннэригэр болҕомто эмиэ ууруллар. Директор Данил Федоров 4 саҥа учууталга эмиэ сибэкки бэлэх уунна. Кылаас салайааччыларыгар бэриллэр букеттарга дьиэ таһынааҕы, кэлии да сибэккилэр бааллар. Иһиттээх сибэккигэ тиийэ. Астык бэлэх. 🍁 Ону тэҥэ хаһыс да сылын дойду үрдүнэн ыытыллар "Самолетик будущего" акция чэрчитинэн 11-рис кылаастар 1-кы кылаас оҕолоругар суруктаах бэйэ оҥоһуктары туттардылар. Үс 11-рис кылаас бары мустубуттары үҥкүүнэн эҕэрдэлээбиттэрэ баҕар оскуола саҥа үгэһэ буолуо. 🍁 Нэһилиэк паарката мас оҥоһуктарынан тупсан, халлаан сылыйан, күннэнэн турар кэмигэр хас да кылаас линейка кэннэ пааркаҕа көрүстүлэр, сибэкки бэристилэр. Учууталлар харыстабыллаах сыһыан туһунан, биллэн турар, санаттылар. 🍁 Антоновка оскуолатыгар быйыл 46 оҕо бастакы кылааска киирдэ. Барыта 562 үөрэнээччи баар. "Ньурба" хаһыат @gazetanyurba @ulusmedia