Нам улууһугар Россиятааҕы дроннар күрэхтэриттэн икки бүк үөрүүлээх сонун кэллэ!
Нам улууһугар Россиятааҕы дроннар күрэхтэриттэн икки бүк үөрүүлээх сонун кэллэ! Саха Республикатын сүүмэрдэммит хамаандата 200 мм уонна 330 мм кылаастаах дроннарга Россия күрэхтэһиитигэр 4 мэтээли ылары ситистэ. Эдэр пилоттар хамаанданан уонна тус күрэхтэһиигэ призердарынан буоллулар. Нам 1 №-дээх оскуолатын 7-с кылааһын үөрэнээччитэ Катя Заболоцкая Саха сиригэр чаҕылхай кыайыыны аҕалла! Катя 330 мм кылаастаах дрону көтүтүүгэ тус зачекка үрүҥ көмүс мэтээли ылары ситистэ. Саха Республикатын дроннар күрэхтэһиилэрин Федерацията иһитиннэрэринэн, бу Россия таһымнаах күрэхтэһиигэ республика сүүмэрдэммит хамаандатын историятыгар бастакы үрүҥ көмүс мэтээлэ буолар. Маны сэргэ Катя Арктика оскуолатын бэрэстэбиитэлэ Уйгулана Антоеваны кытта эмиэ 330 мм кылаастаах дроннары көтүтүүгэ хамаанданан зачекка боруонса призерунан ааттанна! Оҕолор ситиһиилэрэ дьаныардаах эрчиллии, наставниктар идэлэрин толору баһылаабыт үлэлэрин уонна үөрэх тэрилтэлэрин өйөөһүннэрин түмүгэ буоларын бэлиэтиибит. Катя Заболоцкая тус тренеринэн Нам 1 №-дээх оскуолатын педагога Баир Васильевич Аргунов буолар. Санатан этэр буоллахха, былырыын Баир Васильевич иитиллээччитэ Сардана Сутакова Россия стимулятордарга күрэҕин хамаанданан киирсиигэ боруонса призерунан тахсыбыта. Бу курдук сыллата оҕолорбут көрдөрүүлэрэ үрдээн иһэрэ барыбытын үөрдэр, киэн туттууну үөскэтэр. Катяны, кини тренерэ Баир Васильевич Аргуновы, Николай Григорьевич Парников директордаах Нам 1 №-дээх оскуолатын коллективын, Саха Республикатын дроннар күрэхтэһиилэрин Федерациятын үрдүк ситиһиилэргитинэн эҕэрдэлиибит! Өссө да кыайыылар кэлэ турдуннар! “Нам улууһа” МО пресс-сулууспата