🌿🌿🌿 — 28 июня 2026 г. в 08:02:54.338

🌿🌿🌿 Дьааҥы куоратыгар дьоһун-мааны Үрүҥ тунах Ыһыах үрдүк таһымҥа ааста! 🌿Бэс ыйын 27 күнүгэр Дьааҥы куоратыгар саха омук саамай күүтүүлээх, сырдык уонна ытык бырааһынньыга — Үрүҥ тунах Ыһыах олус далааһыннаахтык буолан ааста. 🌿Быйылгы ыһыах Арассыыйаҕа Сомоҕолоһуу, Республикаҕа Культура уонна оройуоҥҥа Тыа хаһаайыстыбатын сылларыгар ананыыта тэрээһин суолтатын, дьон-сэргэ түмсүүтүн өссө үрдэттэ. 🌿Дьоро күн үөрүүлээх быһыыга-майгыга түмсүүлээх түөлбэлэр дьэрэкээн параадтарынан саҕаланна. 🌿Сахалыы сиэринэн-туомунан Аал уокка ас кээһэн, Айыыларга хайыһан ытык алгыс этиллэн, Ыһыахпыт сүрүн арыллыытын улахан сиэрэ-туома тутулунна. 🌿Куорат иһинээҕи ыһыахпыт биир күн иһигэр Республиканскай уонна оройуоннай масштабтаах улахан тэрээһиҥҥэ кубулуйан, олус баай ис хоһоонноохтук барда: 🌿Абсолютнай Хапсаҕай: Ыһыах сүрүн киэргэлинэн уонна көрөөччү болҕомтотун тарпыт түгэнинэн Аан дойдутааҕы уонна Россия Федерациятын Хапсаҕайга президенэ Нестеров Вячеслав Анатольевич туруорбут анал бирииһигэр күөн-көрсүһүү буолла. Боотурдар сытыы хапсыһыылара, сылбырҕа туттуулара дьон сэҥээриитин ылыан ылла. 🌿«Дьааҥым сирин мааны Далбар Хотуна»: Кэрэ аҥаардарга аналлаах күрэххэ кыттан, Дьааҥы мааны дьахталлара уус-уран дьоҕурдарын, сахалыы сиэрин-майгытын, мындырын көрдөрдүлэр. 🌿Кэлэр көлүөнэ кэскилэ: Оҕолорбутугар аналлаах саха таҥаһыгар уонна ырыаҕа күрэхтэр ыһыах көрүн-нарын ситэрдилэр. Кырачааннарбыт төрүт үгэстэрбитин салгыы сайыннараллара барыбытын үөртэ. 🌿Түөлбэлэр күрэхтэрэ: Дьааҥы оройуонугар Совхоз тэриллибитэ 65 сылыгар аналлаах түөлбэлэринэн күрэх дьону-сэргэни биир сомоҕо оҥордо. Хас биирдии түөлбэ бэйэтин уратытын, үлэҕэ-хамнаска дьоҕурун көрдөрөн, бииртэн биир интэриэһинэй түгэннэри бэлэхтээтилэр. 🌿Маннык киэҥ далааһыннаах, элбэх араас хайысхалаах күрэхтэрдээх куорат иһинээҕи ыһыахпыт биир күн иһигэр Республиканскай, оройуоннай масштабтаах улахан тэрээһин буолан үрдүк таһымҥа ситиһиилээхтик ааспытыгар Дьааҥы куоратын бары олохтоохторугар уонна ыһыах көхтөөх кыттааччыларыгар муҥура суох барҕа махталбытын тиэрдэбит! Эһиги түмсүүлээх, биир сомоҕо буолуугутунан, төрүт үгэстэргэ дириҥ убаастабылыгытынан бу дьоро күн олус чаҕылхайдык уонна умнуллубаттык ааста. Тэрийээччилэр үрдүк маастарыстыбалара уонна норуот өйөбүлэ бу ыһыаҕы чахчы даҕаны ураты кэрэ гыннылар. Уруй-айхал! Аал уот оттуннун, алгыс тыл атылыннын!