Хамаҕаттаҕа III республикатааҕы Уһунуускай ааҕыылара — 30 марта 2026 г. в 07:41:45.551
Хамаҕаттаҕа III республикатааҕы Уһунуускай ааҕыылара Кулун тутар 28 күнүгэр Е.М.Шапошников аатынан Хамаҕатта орто оскуолатыгар дэгиттэр талааннаах, айылҕаттан айдарыылаах учуутал, суруйааччы РСФСР үөрэҕириитин туйгуна, «Учууталлар учууталлара», СР педагогическай үлэтин Бочуоттаах ветерана, СР суруйааччыларын Союһун чилиэнэ, Нам, Орто-Халыма улуустарын , Хамаҕатта, Түүлээх, 1 Хаҥалас нэһилиэктэрин Ытык киһитэ, Нам улууһун Өрөгөй ырыатын ааптара Баһылай Баһылайабыс Уһунуускай - Сэки айымньыларынан III республикатааҕы Уһунуускай ааҕыылара уус-уран айымньы кэрэтин кэрэхсиир айар талааннаах оҕолору түмтэ. Бу улахан тэрээһин „Оҕо саас сирдьиттэрэ“ республикатааҕы тирэх киин быһаччы өйөбүлүнэн, „Орлята России“ программа чэрчитинэн ыытыллар. Күрэх аан бастаан 2007 сыллаахха улуус иһинэн ыытыллыбыта, онтон 2017 сыллаахха Баһылай Баһылайабыс 85 сааһын көрсө республика таһымыгар тахсыбыта. Быйылгы ааҕыыларга Дьокуускай куораттан, Томпо, Кэбээйи, Уус – Алдан улуустарыттан, Нам улууһун 11 оскуолатыттан 141 үѳрэнээччи кыттан бастыҥнары тургутустулар. Күрэх күндү ыалдьыттарынан буоллулар СР тыатын хаһаайыстыбатын Үтүөлээх үлэһитэ, СР Бочуоттаах ветерана, Нам улууһун, Хамаҕатта нэһилиэгин Бочуоттаах олохтооҕо, Б.Б.Уһунуускай – Сэки чугас доҕоро Захаров Николай Дмитриевич, Хамаҕатта нэһилиэгин Аҕа баһылыга, Б.Б. Уһунуускай – Сэки сиэнэ Ушницкай Евгений Сергеевич. Оҕолор 5 хайысханан – айымньыны уус-уран ааҕыыга, уруһуйга, ырыаҕа, айар үлэҕэ, тэттик кинигэ оҥорууга кыттан талба талааннарын арыйдылар, көрөөччүлэри сөхтөрдүлэр. Күөн-күрэс сүрүн бирииһин – Кылаан чыпчаал үрдүк ааты уонна Ушницкайдар аймах туруорбут бириистэрин Түбэ орто оскуолатын 3 кылааһын үөрэнээччитэ хомоҕой тыллаах хоһоонньут Григорьев Арчын ылан үөрүү өрөгөйүн биллэ. Бука бары кыттааччыларга, салайааччыларга сыралаах үлэҕит иһин махталбытын тиэрдэбит, кэрэни кэрэхсиир, үтүѳнү үксэтэр талааҥҥыт таҕыстын, дьоҕургут уһугуннун диэн алгыспытын аныыбыт. Аныгыскы кѳрсүѳххэ диэри!